Várrepresideanta Laila Susanne Vars deaivvai Francois Paulette, Dene Nation hoavdda, miessemánu 10. b. Diehtosiiddas. Francois Paulette lea guossis Norggas ja son háliidii deaivat Sámedikki ohcan dihtii doarjaga bissehit Statoila doaimma oljosáttoávkkástallama oktavuođas Kanadas.
Čoahkkimis oassálasttii maiddái sámediggeáirras ja Sámi parlamentáralaš ráđi lahttu, Aili Keskitalo. Sámi girkoráđđi, WWF ja Greenpeace čuvvot Francios Paulette su mátkkis.
Francois Paulette lea máŋga jagi čalmmustahttán bihkkasáttodoaimma Albertas, Kanadas. Son lea kanadalaš indiánačeardda hoavda ja son dovddahii ilu go beasai deaivvadit Sámedikkiin. Son muitalii mo oljosáttoávkkástallan váikkuha sin guvlui ja álbmogii.
- Sámediggeráđđi lea hui duhtameahttun oljosáttoávkkástallama birasváikkuhusaiguin, mas lossametállat ja eará birasmirkkot luvvejuvvojit ja nuoskkidit vuođđočázi ja jogaid ekologalaččat rašis guovlluin ja daid váikkuhusaiguin mii das čielgasit lea guliide, elliide ja olbmuid dien guovllus. Dasa lassin golggiidit dát jogat Árktisis, gos lea bures duođaštuvvon ahte birasmirkkot čoagganit biepmusráidui, dajai várrepresideanta Laila Susanne Vars.
Oljosáttoresursa gokčá guovllu man viidodat lea 1/3 oassi Norgga eanaviidodagas ja vaikke vel vahágat leat juo stuorrát, de lea ávkkástallojuvvon dušše 2 proseanttain resurssas dán rádjai.
Francois Paulette lea dan guovllus eret gos Statoil lea ávkkástallamin oljosádduin. Pauøette háliida čalmmustahttit dáid vahágiid maid doaibma dagaha guovllu álgoálbmogiidda ja sávvá ahte norgga oljosearvi Statoil geassáda eret guovllus. Paulette bivddii veahki Sámedikkis váikkuhit dasa ahte Statoil loahpaha oljosáttodoaimmas Albertas, Kanadas.
Oktiigullevašvuohta ja ovttasbargu
- Sámediggái lea ovttasbargu eará álgoálbmogiiguin hui deaŧalaš ii ge Sámediggeráđđi dohkket ahte Statoil čađaha prošeavttaid álgoálbmotguovlluin ovdalgo guoskevaš álgoálbmogat leat miehtan dasa daid dieđuid vuođul, mat sidjiide leat addojuvvon. Dat ii leat min dieđuid mielde dáhpáhuvvan oljosáttoprošeavtta oktavuođas Albertas, Kanadas. Mii áigut čuovvolit ášši dalán Statoil eaiggádiid ektui, dáhkidii várrepresideanta Vars.
Várrepresideanta Vars čujuhii loahpas dasa ahte Statoil lea geatnegahttojuvvon ollašuhttit Norgga álbmotrievttálaš geatnegasvuođaid buot máilmmi álgoálbmogiid ektui, ii dušše sápmelaččaid ektui, go norgga fitnodagain leat doaimmat eará riikkain.
Oktavuođaolmmoš:
Várrepresideanta Laila Susanne Vars, tlf. 977 54 102