Ráđđehus ferte bisuhit ja nannet váikkuhangaskaomiid doaibmabidjoguovllus. Dat lei Sámediggeráđi lahttu Marianne Balto váldodiehtu gielda- ja guovlluministarii Liv Signe Navarsete. Navarsete lei vuossárgga čakčamánu 17. b. Girkonjárggas Davvi-Romssa ja Finnmárkku doaibmabidjoguovlu geahčadeami oktavuođas. NORUT Alta lea čađahan geahčadanbarggu.
- Sámedikki iežas analysat sámi guovlluid ektui, čájehit ahte guovddáštahttindovdomearkkat leat dat seamma mat NORUT Alta raporttas maid bohtet ovdan, dušše garraseappot, dajai Marianne Balto, gii maŋŋá geigii Sámedikki ealáhusdieđáhusa gielda- ja guovlluministarii.
Čoahkkinoasseváldiid gaskkas ledje olbmot hui ovttaoaivilis ahte doaibmabijut guovllus leat váikkuhan, sis gaskkas lei maiddái Finnmárkku fylkkasátnejođiheaddji Runar Sjåstad.
Finnmárku ja čieža davveleamos Romssa gieldda gullet Doaibmabidjoguvlui. Váikkuhangaskaoapmin guovllus leat bargoaddidivadis luvven, šleađgadivadis luvven, personvearu vuolideapmi, oahppoloana sihkkun ja eanet mánáidoadju. Don sáhtát lohkat Norut Alta raportta dákko.
Oktavuohtaolmmoš:
Ráđđelahttu Marianne Balto, tel. 480 63 358