Ráđđelahttu Vibeke Larsen lea hui duhtavaš go oljo- ja energiijaministtar Ola Borten Moe galledii Sámedikki odne. Sártnistis Sámediggi divasčoahkkimii deattuhii stáhtaráđđi ahte sámi beroštumit galget boahtte áiggis bures vuhtiiváldojuvvot áššiin mat gusket energiijahuksemiidda.
- Mun liikojin hui bures dasa go stáhtaráđđi nu čielgasit dajai ahte dat ii leat álgu bieggafápmohuksemiidda mat dahkkojuvvojit Fosenis Davvi-Trøndelagas, muhto baicca loahppa bieggafápmohuksemiidda davvin. Stáhtaráđđi čájeha dakko bokte ahte son lea guldalan Sámedikki, ja ipmirdan boazoealáhusa ja sámi báikegoddiid dárbbu čájehit várrogasvuođa go guoská sámi guovlluid sisabahkkemiidda, dadjá Vibeke Larsen.
Borten Moe dajai sártnistis Sámedikki álbmotválljejuvvon orgánii ahte eanas ohcamat mat gusket bieggafápmohuksemiidda ja stuorat energiijaguoskevaš areálasisabahkkemiidda davvin sámi guovlluin eai goasse realiserejuvvo. Sivva lea ahte deaŧalaš sámi beroštumit sáhttet vuoittahallat ja go muhtun áššiin lea beare alla soabatmeahttunvuohta.
- Lea maid illudahtti go stáhtaráđđi maid oaidná dárbbu ollislaš váikkuhusčielggadussii, ii dušše baikkalaččat. Boazodoallit vásihit odne ahte stuora areálasisabahkkemat plánejuvvojit sihke mearragáddái ja siseatnamii, ja mat čuhcet sihke dálve- ja geasseguohtumiidda, ja diet áššit eai guorahallojuvvo oktanaga.
- Boahtte áiggis mii mielas bargat ovttas Ola Borten Moein ja Oljo- ja energiijadepartemeanttain. Stáhtaráđis lea dál čielga áigumuš konstruktiivvalaččat ovttasbargat go guoská boahtteáigái, maiddái go guoská sámi guovlluide ja sámi beroštumiide, loahpaha Larsen.
Gulahalli:
Sámediggeráđđi Vibeke Larsen, tel. +47 941 30 116