Lea mearriduvvon sierra sámi prinsihppaoassi mii gusto buot skuvllaide sámegiela hálddašanguovllus. Oahpahusa prinsihpain lea sámi skuvlla definišuvdna: Namahus "sámi skuvla" lea oktasašskuvlla oassi ja mearkkaša skuvlla dahje joavkku, gos vuođđooahpahus čuovvu Máhttolokten - Sámi oahppoplánabuktosa.
Prinsihppaoassái gullá sámi oahppoplakáhtta mas vuosttaš čuokkis čuodjá ná:
Sámi skuvla ja oahppofitnodat galgá:
- láhčit dili nu ahte oahppit ja fidnooahppit ožžot kvalitehtalaš buori oahpahusa mas vuođđun lea sámegiella, sámi kultuvra ja servodateallin
Dát mearrádus galgá leat vuođđun buot oahpahussii sámi skuvllas, maid dan oahpahussii mii addo našunála oahppoplánaid mielde, ovdamearkka dihte matematihkas. Prinsihpalaččat leat buot oahppoplánat sámi oahppoplánat go buot oahpahus buot gelbbolašvuođamihttomeriin galgá leat sámi perspektiivvas.
Sámi skuvllas ii leat geatnegahtton ahte buot ohppiin galgá leat sámegiella fágan, muhto buohkat galget oažžut oahpahusa sámi parallealla seammaárvosaš oahppoplánaid mielde main lea nannoset sámi sisdoallu go dábálaš oahppoplánain.
Oahpahusa prinsihpat – sámi gávnnat davvisámegillii ja dárogillii dáppe: https://www.udir.no/laring-og-trivsel/lareplanverket/kunnskapsloftet-samisk/prinsipper-for-opplaringen-samisk/