Sámediggeráđđi Thomas Åhren doalaha Sámedikki moaitámuša boazolohkogeahpedeami prosessii. Son oaivvilda ahte ollu boazodolliide Finnmárkkus čuohcá máŋgga ráđđehusa oktasaš ráŋggáštanpolitihkka vaikke vel sii leat ge vigiheamit.
-Sámediggi oaidná dan dárbbu ahte geahpedit boazologu Finnmárkkus, muhto mii oaivvildit ahte proseassa lea geavvan boastut. 2007:s bođii ođđa boazodoalloláhka, buriid áigumušaiguin ollašuhttit eanet iešstivrejumi. Orohagat ja siiddat galge ieža leat árjjalaččat mielde mearrideamen bajimus boazologu, ja ledje bures álggahan dán barggu ovttas boazodoallostivrrain. Muhto departemeanta válljii baicce badjelgeahččat boazodoalu, ja nu dat bilidii proseassa, oaivvilda Åhren.
Åhren oaivvilda dát proseassa dat dagahii dan gilvvohallama mas ollu boazoeaiggádat posisjonerejedje iežaset daid earáid ektui. – Mun oainnu mielde lea deaŧalaš čujuhit dan ahte stáhta boazodoallopolitihkka dat lei mii vuolggahii dan gilvvohallama mas ollugat leat lasihan iežaset boazologu strategalaččat. Dan lei sáhttit čoavdit áibbas eará láhkai. Dál gillájit buohkat daid oktasaš ráŋggáštandoaibmabijuid geažil, maid stáhta lea čađahan váidudan dihtii iežaset boasttuárvvoštallamii, deattasta Åhren.
Son oaivvilda ahte boazodoallopolitihkka lea áibbas endorii geavvan go eai leat ortnegat mat movttiidahttet eaktodáhtolaš geahpedeapmái. – Politihka reaiddut berrejit leat ollu eanet go dušše spihčá ja áitagat. Dál eat dieđe guđe váikkuhusaid geahpedeamit buktet ovttaskasolbmui dahje boazodollui oppalaččat, deattasta Åhren.
-Lihkostuvvi resursahálddašeapmi sorjá das ahte oassálastit leat ieža mielde proseassas. Deaŧaleamos lea ásahit dássidis čovdosiid main leat bistevaš čovdosat boazolohkoáššái. Ii leat maŋŋit geahčadit mo ovttas boazodoalloealáhusain sáhttá gávdnat luohttámušluovvi vugiid mo geahpedit boazologu, dadjá Åhren.
Go eanandoalloministtar Sylvia Listhaug evttoha ahte boahtteáiggis galgá buot siidaosiid boazologuid almmuhit, de várre Åhren.
-Almmuhit juohke boazodoalli boazologu ii leat dakkár maid eambbo sáhttá dahkat. Dát lea sámi riekteáddejumi čielga rihkkun, ja lea dakkár vuohki maid ii sáhte čađahit ovdalgo lea árvvoštallan váikkuhusaid vuđolaččat. Mun oaivvildan ahte dat ii leat dárbbašlaš ge, go hálddahusas han leat dat logut liikká, ja go siidadásis lea rabasvuohta bajimus boazologu ektui. Dakkár árvvoštallama oktavuođas bivdit mii Sámedikki bealis konsultašuvnnaid departemeanttain, loahpaha Åhren.