Dáhpáhuvvá duollet dálle ahte vánhemat váldet oktavuođa Sámedikkiin, ja Sámediggi oaidná mediain ahte leat sámi oahppit geat eai oaččo oahpahusa sámegielas. Sámediggeráđđi Silje Karine Muotka reagere garrasit das go gielddat eai láže dili sámegieloahpahussii, nu go sii leat geatnegahtton.
- Oahpahus sámegielas skuvllas lea vuođđun giellagelbbolašvuhtii maid sámi servodagat ja servodat muđuige dárbbašit. Dasa lassin lea sámi ohppiin lága mielde vuoigatvuohta oažžut sámegieloahpahusa, dadjá sámediggeráđđi Silje Karine Muotka gii lea dolkan dasa ahte ferte muitalit gielddaide dan.
Duogážin su reakšuvdnii lea go NRK Sápmi muitalii vuossárgga skábmamánu 24. beaivvi golbma oahppi birra Oarjjefuoldá suohkanis geat eai leat ožžon oahpahusa sámegielas. Sámi ohppiin lea oktagaslaš vuoigatvuohta oažžut oahpahusa sámegielas beroškeahttá gos sii orrot, ja leat gielddat geat leat skuvlaeaiggádat gean lea ovddasvástádus.
- Oarjjefuoldá suohkan rihkku lága dás. Mun lean duššástuvvan go ferten johtit gielddas gildii ja ánuhit sin čuovvut oahpahuslága. Čuovvut lágaid galggašii leat diehttelasvuohta, muhto dávjá ii dahkko dat sámi ohppiid ektui. Geatnegasvuođat mánáidkonvenšuvnna, mánáidgárdelága, láhkaásahusaid, oahppoplánaid ja vuođđolága mielde rihkkojuvvojit beaivválaččat norgga gielddain, ja dat lea fuolastahtti, dadjá Muotka.
Lea ásahuvvon giellalávdegoddi mii galgá bargat dan ala ahte nannet sámegielaid. Sámediggi sávvá lávdegoddi meannuda maid oahpahusáššiid ja movt mii sáhttit sihkkarastit ahte vuoigatvuođat ollašuhttojit.
- Giellalávdegoddi ferte dáid hástalusaid váldit duođas. Buot orro čájeheame ahte mii dárbbašit vel buorebut čielggadit lágaid ja garraset bearráigeahčču gielddaid ektui. Ovdamearkka dihte ferte geahčadit doaibmá go Fylkkamánni váiddaásahussan nu go galggašii, vai lea go dárbu sierra áittardeaddji sámegielvuoigatvuođaide, dadjá Muotka.
- Vuos ávžžuhan buohkaid geat formálalaččat váidalit Fylkkamánnái oahpahuslága ja mánáidgárdelága rihkkumiid birra ahte sáddejit kopiija váidagis Sámediggái. Mii dárbbašit buot dan duođaštusa maid mii sáhttit oažžut dili birra vai mii sáhttit čuovvolit áššiid gielddaiguin ja dokumenteret váttisvuođa guovddášeiseválddiide, loahpaha sámediggeráđđi Muotka.