Dán vahku lágida Julggaštus givssideami vuostá áŋggirdeami “Rávesolbmot duddjojit ustitvuođa – ovttas”. Sáhtát searvat Ustitvuođabeaivvi čakčamánu 5. b. dahje sosiála mediain.
Ulbmilin lea čalmmustahttit rávesolbmuid ovddasvástádusa láhčimis dasa ahte mánáide šaddá čáhkkilis bajásšaddanbiras mas givssideapmi ii dohkkehuvvo.
- Buohkat sáhttet veahkkin čalmmustahttit Ustitvuođabeaivvi čakčamánu 5. b. báikegottis, skuvllas dahje bargosajis. Ja mii sáhttit buohkat geavahit sosiála mediaid, fáddásániiguin #ustitvuohta ja #givssideapmi. Čájet ahte don leat váldán beali, ávžžuha Sámedikki várrepresideanta Odd Iver Sara.
Áŋggirdeapmi álggahuvvo odne Kampen skuvllas Oslos, ja Odd Iver Sara oassálastá Sámedikki bealis searvevuođas Julggaštusain givssideami vuostá.
- Mii fertet buohkat searvat vuosttaldeapmái, mii eat sáhte vuordit ahte earát dahket dan min ovddas. Don fertet áŋgiruššat, dadjá Sara.
Gulahallan
Várrepresideanta Odd Iver Sara, tel. +47 416 61 621