-Lean ilus go gielddat nannejuvvojit eanet bargamušaiguin, muhto dat ferte seammás nannet bálvalusaid sámi álbmogii. Dađibahábut ii váilu dát bealli dan ráđđehusa stuorradiggedieđáhusas mii biddjojuvvui ovdan odne, dadjá sámediggeráđđi Ann-Mari Thomassen.
Stuorradiggedieđáhus “Suohkanođastus - ođđa bargamušaid birra stuorra gielddaide” bijai ráđđehus ovdan odne. Dieđáhus lea oassin gieldaođastusbarggus stuorát ja buoret gielddaid várás, ja das leat dakkár fáttát go dearvvašvuohta, joatkkaoahpahus ja álbmotválljen regionála dásit.
-Go árvvoštallet sirdit oasi ovddasvástádusas gielddaide gieđahallat psyhkalaš dearvvašvuođa, de lea stuorra várra ahte fágagelbbolašvuohta deaŧalaš giellamáhtuin ja kulturáddejumiin ii leat sápmelaččaide olámuttus. Dat sáhttá dagahit boasttu- ja heajut divššu, dadjá Thomassen.
Go veardádallet sirdit bargamušaid suohkaniidda, de ferte maiddái veardádallat ahte buktá go dát doarvái buori fálaldaga buot pasieanttaide, maiddái sámi pasieanttaide. Go barga psykálaš gillámušaiguin de lea giella ja kulturáddejupmi áibbas dárbbašlaš buori ja rivttes dikšui.
Jämtlands län lea mieđihan ahte sis ii leat dat dárbbašlaš gelbbolašvuohta sámi gielas ja kultuvrras veahkehit nuorra sápmelaččaid Ruoŧas geat gillájit iešsorbmen jurdagiiguin, ja dahkan ovttasbargošiehtadusa Sámi našuvnnalaš gealboguovddážiin - psyhkalaš dearvvasvuođasuddjen ja gárrendilledikšu (SÁNAG).
-Mii leat vásihan ahte ii leat álo seamma buorre máhttu sámi pasieanttaid dárbbuid birra ja váilevaš fágaresurssaid birra. Dát dagaha ahte sámi pasieanttat eai oaččo doarvái buori fálaldaga, lohká Thomassen. Mii váruhat maid ahte ekonomalaš ákkat geavahuvvojit dasa ahte eai áiggo ohcat veahki olggobealde iežas suohkana nugo Jämtlands län lea dahkan.
Stuorradikki gielddakomitea meannudišgoahtá stuorradiggedieđáhusa maŋŋá beassážiid.
-Lean juo šiehtadan čoahkkima gielddakomiteain cuoŋománu 7. b. digaštallat mo sámi perspektiiva sáhttá nannejuvvot go eanet bargamušat sirdojuvvojit gielddaide. Jáhkán ahte gielddakomitea ádde ahte sámi giella, kultuvra ja servodat nannejuvvo go eambbo bargamušat sirdojuvvojit gielddaide, loahpaha sámediggeráđđi Ann-Mari Thomassen.
Eanet dieđut: Sámediggeráđđelahttu, Ann-Mari Thomassen, 900 57 123