– Dálá bušeahttaproseassa lea sihke eahpebeaktil ja lossat, dat gáibida dárbbašmeahttun ollu resurssaid sihke Sámedikki ja departemeanttaid bealis, dadjá bušeahttaovddasvástideaddji sámediggeráđđi Henrik Olsen.
Gielda- ja ođasmahttindepartemeanta oaččui čađahuvvot čielggadusa vai sáhttá árvvoštallat Sámedikki juolludemiid sirdojuvvot ovtta postii. Gielda- ja ođasmahttindepartemeanta lea konsulteren Sámedikki dan birra, muhto ii sohppojuvvon ovttamielalašvuohta.
– Sámediggi háliida ahte ovddiduvvo proposišuvdna mii bidjá dihto láidestusaid dasa mo mearridit Sámedikki bušeahta seamma dásis go Gieldaproposišuvdna, mii dál gusto gielddasuorgái. Dasa ii sáhttán departemeanta miehtat, nu ahte ášši lea dál bisánan. Mii háliidit ahte Stuorradiggi dál váldá dan ášši sihkkarastin dihtii ahte riikkaidgaskasaš geatnegasvuođat čuovvuluvvojit, dadjá Olsen.
– Sámi kultuvra badjelgehččojuvvo
Sámediggeráđđi lea hábmen Sámedikki bušeahttadárbbu áigodahkii 2018-2022 ja háliida čalmmustahttit dárbbuid sámi kulturviesuide.
– Norgga eiseválddit leat badjelgeahččan sámi servodagaid vuoigatvuođa fidnet kultuvrralaš arenaid dainna lágiin ahte sii leat vihpadan buot sámi kulturviesuid. Ráđđehusas lea vuođđolága vuođul ovddasvástádus láhčit dasa ahte sápmelaččat sáhttet ovddidit gielaset, kultuvrraset ja servodateallimeaset. Dat mo dát ášši lea meannuduvvon jagiid čađa, čájeha man stuorra váttisvuohtan dat lea go guovddáš eiseválddiid bealis eai ane sámi kultuvrra dásseárvosažžan dáža kultuvrrain, dadjá Olsen.
Sámediggi lea máŋggaid jagiid bivdán juolludusaid konkrehta ja guhká plánejuvvon visteáššiide, nu go Saemien Sijte, Beaivváš Sámi Našunálateáhter ja ođđa sámi dáiddamusea, ii ge ráđđehus leat čuovvulan dan. Dat lea dagahan ahte sámi kulturásahusat eai leat beassan ovdánit seamma láhkai go dáža kulturásahusat.
Jearahallama várás sáhttá váldit oktavuođa Henrik Olseniin. Tel. 907 75 219