Sámedikki várrepresideanta Laila Susanne Vars rámida Romssa universitehta áŋgiruššama sámegielain ja sámi oahpaheaddjioahpuin. Čavčča rájes ásaha universitehta ođđa masteroahpu oahpaheddjiid várás geain lea sámegiella vierisgiellan.
- Fálaldat lea mielde loktemin sámegiela, oahpaheaddjistudeanttaid ja daid ohppiid geaid sii dasto galget oahpahit gielddain. Dat lasiha giellageavaheddjiid ja lea hui bures heivehuvvon dan Sámedikki ja Romssa suohkana gaskasaš ovttasbargošiehtadusa áigumušaide, maid mii leat evttohan, dadjá Sámedikki várrepresideanta Laila Susanne Vars.
Sámediggi lea ovttasbargošiehtadusa bokte Romssa suohkaniin geatnegahttojuvvon veahkehit háhkat fágaolbmuid geain lea sámegielgelbbolašvuohta. 2006 rájes lea daid ohppiid lohku njiedjan, geain lea sámegiella 2. giellan, seammás go daid oahpaheddjiid lohku gielddain, geat sáhttet oahpahit sámegiela 2. giellan, lea njiedjan Romssas ja Finnmárkkus. Romssa universitehtas lea nationála ovddasvástádus sámi alitoahpus ja dutkamis.
- Mun oainnán ahte dárbbašuvvo buoret ja lávgadet ovttasbargu sámegiela ovddideamis ja oahpahusas gaskal dáža ja sámi oahppo- ja dutkanásahusaid davvin. Doppe leat máŋga iešguđet oassálastit ja dárbbašuvvo oktiiordnen ja ovttasbargu, dadjá Vars.
Sámedikki várrepresideanta Laila Susanne Vars deaivvada otne (21.02.2013) Universitehta ođđa oahppofálaldaga ovddasteddjiiguin. Vars galgá seammás čoahkkinastit universitehta rektoriin Jarle Aarbakke.in oažžun dihtii dieđuid Finnmárkku allaskuvlla ja Romssa universitehta ovttastahttima birra.
Gulahalli
Sámedikki várrepresideanta Laila Susanne Vars, tel. +47 977 54 102
Eanet dieđut
UIT: Utdanner lærere som kan undervise på samisk
UIT: Samisk som fremmedspråk