Ovddit čavčča gulaskuddančoahkkimat čalmmustahtte hástalusa girjealmmuhemiid oktavuođas, go máŋggas sávve árabut ohcanáigemeari girjjálašvuođaohcamiidda. Dan lea Sámediggi váldán vuhtii, ja danne leat sirdán ohcanáigemeari girjjálašvuođaohcamiidda njukčamánu 1. beaivái.
Gulaskuddan maiddái čalmmustahtii dan ahte e-girjjit sámegillii illá gávdnojit, danne lea Sámediggi mearridan geatnegahttit girjealmmuheddjiid maiddái buvttadit e-girjjiid seammás go dahket dábálaš girjji.
Lei maid sávaldat girjjálašvuođafidnus beassat eret geatnegahtton konsuleantacealkámušas giehtačállosiin, ja dan lea maid Sámediggi mearridan rievdadit, nu ahte 2017 rájes sáhttet redaktevrrat ieža čállit cealkámuša evttohuvvon girjeprošeavttaide.
Dás gávnnat njuolggadusaid ja digitála ohcanskovi maid fertet deavdit go ozat doarjaga.