Lásse-Ivvár Erke bargá odne Sámeráđis olmmošvuoigatvuođaid ossodaga jođiheaddjin. Son lea nammaduvvon Sámediggeráđi ráđđeaddin 2017-2021 áigodahkii.
Lásse-Ivvár Erke lea jurista, ja sus lea master riektediehtagis UiT Norgga árktalaš universitehtas. Son lea bargan guhtta jagi Gielda- ja ođasmahttindepartemeantas, Sámi ja minoritehtapolitihkalaš ossodagas (2011-2016).
– Lean hui giitevaš luohttámuša ovddas ja illudan bargagoahtit Sámedikki samepolitihkain, maŋŋel go lean máŋga jagi bargan eará bargguid, lohká Lásse-Ivvár Erke.
Sámediggepresideanta Aili Keskitalo illuda maid bargagoahtit ovttas ođđa politihkalaš ráđđeaddiin.
– Lásse-Ivvár Erke lea čeahppi ja sus lea nanu fágalaš duogáš ja viiddis hárjáneapmi. Son boahtá nannet min politihkalaš barggu vuoigatvuohtaprofiilla, lohká Keskitalo.
Lásse-Ivvár Erke álgá bargui ođđajagimánu 1. beaivvi, ja galgá bargat Guovdageainnus.
Jearahallamiid oktavuođas sáhttá Lásse-Ivvár Erkke oažžut ságaide mobiilas: 970 80 217
Sámediggepresideanta Aili Keskitalo lea čakčat nammadan Guovddášbellodaga Anne Toril Eriksen Balto (40) ođđa politihkalaš ráđđeaddin. Maiddái Balto áigu virgái álgit dakka maŋŋá ođđajagi.