Nasjonal transportplan (NTP) lea plána mii 10 jahkái galgá gustot fievrrideapmái Norggas, ja ođasmahttojuvvot juohke njealját jagi ovdal stuorradiggeválgga. Plána bidjá láidestusaid geainnuid huksemii, doaimmaheapmái ja bajásdoallamii ja oktasašjohtalussii. Go 2014-2023 plána ovddiduvvui guovvamánu 29. b., de čielggai ahte bargu Deanu šalddiin sáhttá álggahuvvot áigodagas 2014-2017 jus rámmat lasihuvvojit 20 proseanttain.
– Sámedikkis ja Finnmárkku fylkkagielddas lea dat gudneáŋgirvuohta ahte Deanu šaldi galgá leat gárvvis maŋimusat 2018, dadjaba fylkkaráđđi Grete Ernø Johansen Finnmárkku fylkkagielddas ja ráđđelahttu Marianne Balto Sámedikkis.
Sámediggi ja Finnmárkku fylkkagielda leat gelddolašvuođain čuvvon barggu dáinna stuorra plánain ja nationála fievrridanplánain 2014-2023 (NTP) mii ovddiduvvui guovvamánu 29. b. dii. 12. NTP galgá leat stuorra johtalusáŋgiruššan olles Norgga várás. Finnmárkku fylkkas, gos leat guhkes gaskkat, lea geainnuid divvun eaktun ássamii ja beasatlašvuhtii.
Almmolaš ovddasvástádus
Finnmárkkus leat stuorra geaidnofierpmit ja šalddit maid standárda lea ollu uhcit go dat mii vurdojuvvo.
- Buorit geainnut ja beasatlašvuohta lea eaktun ealáhusaid ja servodaga ovdáneapmái Finnmárkkus ja sámi guovlluin. Deanu šaldi lea leamaš heajos dilis 90-logu rájes, ja mii leat ilus go nationála eiseválddit dál áigot hukset ođđa šaldi, dadjá ráđđelahttu Marianne Balto.
Fylkkaráđđi Grete Ernø Johansen lasiha ahte geainnuid ja šalddiid divvun lea almmolaš ovddasvástádus.
- Eai Sámedikkis eai ge Finnmárkku fylkkagielddas leat ruđat geavahan láhkai go almmolašvuohta beahttá, čujuha son.
- Mii vuordit ahte stáhta veahkeha lasihit bušeahta 20 proseanttain vai ovdanbiddjojuvvon fievrridanplána sáhttá čađahit. Finnmárku han lea mielde lasiheamen ollu ruđaid nationálabušehttii resurssaidis bokte, ja ánssáša fuolahuvvot šalde- ja geaidnohuksemiiguin, loahpaheaba Ernø Johansen ja Balto.
Gulahalli:
Sámediggeráđđi Marianne Balto, Marianne Balto, tel. 480 63 358