-Háliidan muittuhit vejolašvuođa ohcat doarjaga doarjjaortnegis árbediehtu ja sámi meahccegeavaheapmi vuođđoskuvllas. Ohcanáigemearri lea guhkiduvvon miessemánu 1. b. 2015 rádjái, lohká sámediggeráđđi Silje Karine Muotka.
-Dát ortnet lea hui gelddolaš mii addá vejolašvuođa bidjat fokusa árbedihtui ja sámi meahccegeavaheapmái vuođđoskuvllas, lohká sámediggeráđđi. Mii háliidit eanet ohcamiid ortnegii, buot guovlluin, muhto áinnas maid lulli- ja julevsámi guovlluin.
-Lea dehálaš ahte árbediehtu ja sámi meahccegeavaheapmi oahpahuvvo boahttevaš buolvvaide. Dáinna doarjjaortnegiin lea vejolaš skuvllaide oažžut liibba bargat árbedieđuin ja sámi meahccegeavahemiin doarjagiin maid dábálaš suohkanbušeahtta ja skuvlaeaiggáda vuoruheapmi ii govčča. Ná sáhttet oahppit oažžut hui árvvolaš oahpu sámi historjjás, árbevieruin ja servodateallimis.
Gulahalli:
Sámediggeráđđi Silje Karine Muotka, tel. 984 87 576
Doarjjaovdamearkkat mat juolluduvvojedje 2014:s:
Billávuona bajásšaddanguovddáš lea ožžon 250 000 ru. doarjaga čađahit prošeavtta luondduresurssat biebpmu várás; ráhkadit biepmu ja máistagiid lunddolaš vuođđoávdnasiin/urtasiin luonddus. Prošeavtta oktavuođas lea ohcci bidjan boađusulbmila ahte oahppit ja oahpaheaddjit galget oažžut lasi gelbbolašvuođa geavahit lagasbirrasa lunddolaš ávkkástallan arenan ja ráhkadit máistagiid, guobbariid, murjjiid ja oahppat láibut bárkoláibbi ovttas mearrasámi kultuvrra vuođđoávdnasiiguin.
Deanu Sámeskuvla lea ožžon 230 000 ru. doarjaga čađahit iešguđetgelágan doaimmaid ovddidit sámegiela, sámi identitehta ja árbevirolaš sámi máhtu ja meahccegeavaheami skuvllas. Seammás galgá prošeakta fievrredit viidáseappot árbedieđu vuorrasit buolvvas nuorat bulvii.
Guovdageainnu mánáidskuvla lea ožžon 120 000 ru. doarjaga čađahit iešguđetgelágan doaimmaid ovddidit sámegiela, sámi identitehta ja árbevirolaš sámi máhtu ja meahccegeavaheami skuvllas. Earet eará galgá skuvla hukset darfegoađi mii galgá doaibmat oahpahusbáikin olggobealde skuvlalanja ja doaibmat arenan sámegiellávgumii ja giellaoahpaheapmái. Eará árbevirolaš doaimmat mat galget čađahuvvot dán prošeavtta oktavuođas, leat earet eará luondduresurssaid háhkan, murren ja muoraid čohkken, sistti dikšun, murjen, nuohttun/fierbmun, láibun sámegáhkuid darfegoađis, sávzzaullu beaskideapmi ja ivdnen, rievssatbivdin ja gárdun.
Tårnet skuvla Mátta Várjjaga gielddas lea ožžon 23 400 ru. doarjaga hukset lávu ja/dehe luovi mii lea ráhkaduvvon muoras ja mii galgá geavahuvvot olgoskuvlabáikin mii lea heivehuvvon doaibmahehttejuvvon olbmuide. Tårnet skuvla lea maid čađahan prošeavtta (2012) mas lei namma ” skuvla kulturguoddin mearrasámi kultuvrra ja vuotnaguolásteami ektui”. Prošeavtta ulbmil lea nannet ohppiid mearrasámi ruohttasiid ja ovddidit mearrasámi kultuvrra. Dát prošeakta lea fátmmastan ja bargan ovttas iešguđetgelágan joavkkuiguin ja servviiguin gilis ja eará resursaolbmuiguin. Dán prošeavtta positiivva vásáhusaid vuođul ovttas ovttasbargoguimmiiguin háliida skuvla dál álggahit prošeavtta 1. – 4. luohká dásis nu ahte buot skuvlla oahppit besset leat mielde oahpahusas 1. luohká rájes.
-Sádde ohcama ovdal miessemánu 1. b. 2015 ja atte din ohppiide vejolašvuođa gazzat oahpu olggobealde skuvlalanja , dadjá sámediggeráđđi Silje Karine Muotka.