Sámediggeráđđi lea gieskat meannudan buot oahpponeavvoohcamiid mat leat boahtán jahkái 2012. Oktiibuot lei várrejuvvon 14,7 miljon ru dábálaš ja erenoamáš oahpponeavvuide, ja mánáidgárddiid oahpponeavvuide, ja Sámediggi oaččui oahpponeavvoohcamiid hui ollu eanet go lei bušeahttarámma 2012:s. Oktiibuot ledje ohcamat lagabui 52 miljon ru ovddas.
Dat go váilot sámegiel oahpponeavvut buot fágain ja buot cehkiin dan rájes go Máhttolokten – sámi bođii, lea eanemusat digaštallojuvvon oahpahuspolitihkalaš ášši sámi servodagas.
-Vuosttažettiin illudahttá dat go nu ollu ledje dál ohcamat oahpponeavvuid buvttadeapmái sámi ohppiid várás, ja go leat ollu ohcamat, de lea vejolaš válljet daid buoremus oahpponeavvuid min ohppiide. Go jurddašit dan duohta heajos oahpponeavvodili mii sámi ohppiin lea, de šállošit dattetge go leat ferten biehttalit 69 ohcama oktiibuot 109 ohcama gaskkas, dadjá várrepresideanta Láilá Susanne Vars.
Sámedikkis lea dan rájes go Sámi oahpahusráđđi biddjojuvvui Sámedikki vuollásažžan 2000:s leamaš ovddasvástádus sierra doarjjaortnegiin sámi oahpponeavvuid ovddideapmái. Vuoruheamit leat dan rájes stivren sierra strategalaš oahpponeavvoplánaid mat leat ovddiduvvon árvalusaid vuođul maid mánáidgárddit ja skuvllat guoskevaš guovlluin leat buktán.
Dien áigodaga rájes otnáš rádjai leat oahpponeavvuid ráhkadeapmi mannan njozet, ollu čavga ekonomalaš rámmaid dihte Sámedikkis ja kapasitehta váttisvuođaid geažil lágádusain. Maŋimuš jagiin lea rávnnjáldat dattetge jorgalahtton.
-Mii oaidnit ahte dál leat ollu oahpponeavvočállit ja lágádusat mat háliidit buvttadit oahpponeavvuid. Dán geažil livččii leamaš vejolaš čoavdit váttis oahpponeavvodili sámi ohppiid ektui govttolaš áiggis. Mii duođai dárbbašit hui nannosit buoridit sámi oahpponeavvobuvttadeami, ja dál luohttit mii ahte ráđđehus váldá bealljái min signálaid ja sihkkarastá Sámediggái dakkár rámmaeavttuid maiguin lea vejolaš čuovvolit áŋgiruššamiid oahpponeavvuiguin, dadjá várrepresideanta loahpas.
Sámediggeráđđi čuovvola ášši politihkalaččat. Maŋŋebárgga geassemánu 20. b. ovddiduvvui ášši Máhttodepartemeantta stáhtačállái Elisabet Dahlei, ja vuossárgga geassemánu 25. b. ledje ságastallamat oahpponeavvodili birra Ođasmahttin- ja hálddahusdepartemeantta sámeministariin Rigmor Aasrud:in.
Oktavuohtaolmmoš:
Várrepresideanta Laila Susanne Vars, tlf. 977 54 102