Boazodoallostivra mearridii geahpidit gorálaš boazologu guovvamánu 26. b. čoahkkimis Romssas. Gorálaš geahpideapmi čuohcá olles ealáhussii. Ovttaskas olmmoš ja ovttaskas siiddat geat leat doallan boazologu dohkálaš dásis fertejit maid geahpidit boazologu seamma go sii mat eai leat dahkan dan. Dákkár oktasaš ráŋggáštus ii leat dohkálaš, cealká ráđđeláhttu Ellinor Marita Jåma.
Go Boazodoallostivrras lei čoahkkin guovvamánu 7. b. maŋiduvvui boazologugeahpidan ášši disdahkii guovvamánu 26. beaivái. Čoahkkima olis Romssas guovvamánu 26.b. gomihuvvui 3 jiena 4 jiena vuostá Sámedikki nammaduvvon stivraáirasat. Eanandoallo- ja biebmodepartemeanta mearrádusevttohus boazologu gorálaš geahpideame mearriduvvui. Geahpidanlohku bidjui 5 %:i.
- Mii leat buohkat ovttaoaivilis ahte boazologu geahpideapmi Finnmárkkus ferte dáhkot olihan dihte kultuvrralaš, ekonomalaš ja ekologalaš gánnáhahtti boazodoalu. Dákkár geahpideapmi ferte dáhkot ovttasráđiin sihke ealáhusain ja Sámedikkiin. Mun lea sakka beahtahallan mearrádusain maid Boazodoallostivra mearridii, cealká ráđđeláhttu Ellinor Marita Jåma.
Son čujuha viidásiid ahte Sámediggi doarju iežaset stivraláhttuid mearrádusa vuosttaldit Eanandoallo- ja biebmodepartemeanta mearrádusevttohusa.
- Mearrádus lea buot dábálaš rievttalaš prinsihpaid vuostá sihke našunála ja internašunála dásis. Dat ekonomalaš ja sosiálalaš váikkuhusat eaige váldo vuhtii maid dat gorálaš geahpideapmi dagaha ealáhussii. Dán olis doarjjun mun min stivraáirasiid mearrádusaset vuosttaldit mearrádusa.
Oktasaš ráŋggáštus, movt gorálaš geahpideapmi praktihkalaččat sáhttá dulkot, čuohcá olles ealáhussii.
- Mun in fuobmá ahte boazodoallolágas gávdno láhkavuođđu dákkár oktasaš ráŋggáštussii. Dasa lassin lea dat evttohuvvon mearrádus álbmotrievttalaš gáibádusaid vuostá, ahte stáhta ii galgga mearridit dahje addit lobi doaimmaide mii sáhttá vahágahttit daid vuđolaš eavttuid mii guoská sámi kultuvrii ja sámi ealáhusaide, earret go jus čuozadeaddji sámit ieža ja Sámediggi miehtaba, cealká ráđđeláhttu Ellinor Marita Jåma.
Ráđđeláhttu Jåma čujuha loahpadeamistis ahte váikko boazologugeahpideapmi Finnmárkkus lea dárbbašlaš, orro leamen dat mearriduvvon mearrádus eahpegovttolaš.
- Váikko leage ovttaoaivilvuohta dasa ahte lea dárbbašlaš geahpidit boazologu eaktuda mearrádus ahte lea ráhkaduvvon strategiijat movt vuoiggalaččat čađahit. Dat ii galgga leat nu ahte ovttaskas olbmot ja ovttaskas siiddat ráŋggáštuvvojit mat leat doallan dan mearriduvvon boazologu. Ráŋggáštit go leat doallan njuolggadusaid lea eahpegovttolaš, loahpaha Ellinor Marita Jåma.
Gulahallanolmmoš:
Ráđđeláhttu Ellinor Marita Jåma, tlf. 916 13 460