Váldofokus dálkkádatšiehtadallamiin lea soahpat doaibmabijuid maiguin vuostálastit dálkkádatrievdamiid ja sihkkarastit heivehemiid dálkkádatrievdamiidda. Mihttomearrin lea mearridit ođđa máilmmiviidosaš dálkkádatšiehtadusa, Parisa-šiehtadusa.
Sámediggi searvá Norgga sáttagotti mielde dálkkádatnjunuščoahkkimii Parisas. Presideanta Aili Keskitalo ja Bargiidbellodaga sámediggejoavkku parlamentáralaš jođiheaddji, Vibeke Larsen, leaba mielde alladásseoasis mii lea juovlamánu 7. ja 8. b.
Stáhtaministtar Erna Solberg, dálkkádat- ja birasministtar Tine Sundtoft ja olgoriikaministtar Børge Brende ovddastit Norgga ráđđehusa.
Álgoálbmotsearvan ja sámi artisttat
Álgoálbmogat buot ON 7 álgoálbmotguovlluin leat bures ovddastuvvon Parisas. Sámit ja inuihtat leat árktalaš guovllus, ja sis lea njunušrolla máilmmi álgoálbmogiid ektui dán vuoru.
Álgoálbmotforum, International Indigenous Peoples Forum on Climate Change (IIPFCC), oktiiordne áŋgiruššama ja Sámiráđđi lea stivrenkomitea lahttu.
COP21, The Indigenous Peoples’ Pavilion oktavuođas lea sierra álgoálbmotpaviljonga: http://www.iipfcc.org/home
Maŋŋebárgga juovlamánu 8. b. lea árktalaš beaivi álgoálbmotpaviljongas. Sámediggi lea addán ekonomalaš doarjaga vai sámi artistta guovttos Elle Márjá Eira ja Sofia Jannok beassaba lávdái.
Sámediggi lea searvan árjjalaččat oppasámi ráhkkanemiide dálkkádatšiehtadallamiidda, ja mii áigut ovttas álgoálbmotforumiin geahččalit váikkuhit dan ahte stáhtat mearridivčče rievttalaš dálkkádatšiehtadusa mas gozihuvvojit álgoálbmogiid beroštumit.
Sámediggi leat buktán rávvagiid norgga posišuvnnaide ahte álgoálbmogiid vuoigatvuođat fertejit doahttaluvvot dalle go dálkkádatpolitihkka ja dálkkádatdoaibmabijut hábmejuvvojit, ja ahte álgoálbmogiid árbedieđut, eallinvuogit ja ekovuogádagat leat deaŧalaš oasit ollislaš dálkkádatčovdosis.
The Equator Prize 2015
ON birasprográmma (UNEP) juohká beakkánis Equator-bálkkašumi Parisas. Bálkkašupmi addojuvvo álgoálbmogiidda ja báikegottiide mat áŋgiruššet mehciid suodjalemiin, dálkkádatheiveheami, ceavzilis eallinvugiid ja eanarivttiid ovddas.
Bálkkašumi oažžut gudnejahttojuvvojit seremoniijas maid Hollywood neavttár Alec Baldwin jođiha, ovttas eará dovddus olbmuiguin. Dálkkádat- ja birasministtar Tine Sundtoft lea mielde doppe ja lea bálkkašumi váldosponsoriid gaskkas.
Norga bargá maiddái eanet dálkkádatruhtademiin álgoálbmogiid ja tropihkalaš mehciid báikegottiid ektui. Dát álgga váldojuvvo ovdan dalle go Equator Prize på Theatre Mogador juhkkojuvvo juovlamánu 7. b. dii. 19.30 – 22.00.
Wapichan-álbmot Guyanas Mátta-Amerihkás lea okta dán jagáš bálkkašumi oažžuid gaskkas. Sii ožžot bálkkašumi earret eará dan ovddas go leat dáistalan eanaguovlluid suodjalemiin mohtorgeaidnohuksemiid, mehciid jalgema, eanadoalu ja ruvkedoaimma vuostá.
ON dadjá vuođustusas ahte ruvkedoaibma nuoskkidahttá čáziid, jalgeha mehciid, buvttiha fuones váikkuhusaid sosiála dillái ja billista bivdoguovlluid ja guolástanbáikkiid Wapichan álbmoga árbevirolaš eallinguovlluin.
-Mun lean duhtavaš go Norgga ráđđehusas lea čielga mihttomearrin gudnejahttit álgoálbmogiid vuoigatvuođaid, oassin Parisa-šiehtadusas, ja ahte álgoálbmogiid vuhtii váldin deattuhuvvo ja vuoruhuvvo dálkkádatheiveheami ja ruhtadeami mearrádusaid oktavuođas. Deaŧalaš lea ahte Norga lea njunnošis máilmmi álgoálbmogiid ektui. Muhto dan maid mii dadjat máilmmis fertet dadjat maiddái dáppe ruovttus. Seamma njuolggadusat galget gustot Norggas sámiid ektui, dalle go lea sáhka álgoálbmogiid kultuvrra ja vuoigatvuođaid gudnejahttimis stuorra industriijahuksemiid oktavuođas. Dát guoská ovdamearkka dihte ruvkedoibmii sámi guovlluin, dadjá presideanta Aili Keskitalo.
ON dálkkádatkonvenšuvdna lea riikkaidgaskasaš dálkkádatovttasbargorámma. Šiehtadallamiid konvenšuvnna vuolde stivrejit jahkásaš oasálaščoahkkimat, COP. COP 21 vuolde lea váldomihttomearrin mearridit ođđa máilmmiviidosaš dálkkádatšiehtadusa mii galgá gustot jagi 2020 rájes ja mearrádusa ruziidluoitimiid bisseheami ektui ovdal jagi 2020.
Šiehtadallamat Parisas álget vuossárgga skábmamánu 30. b. ja loahpahuvvojit bearjadaga juovlamánu 11. b.
Gulahallan: seniorráđđeaddi Jon Petter Gintal, tel: +47 99 77 48 48, e-poasta: jon.petter.gintal@samediggi.no