Norgga ja Ruoŧa bealde Sámedikkit leat ovttas Ruoŧta Sámiid Riikkaservviin ja Norgga Boazosápmelaččaid Riikkaservviin ožžon bargun Nogga ja Ruođa ráđđehusain bargat viidáseappot Norgga-Ruoŧa boazodoallokonvenšuvnnain. Ulbmilin lea oažžut dakkár konvenšuvnna mii fuolaha buot áššbeliid vuoigatvuođaid ja beroštusaid buori láhkai.
-Dát bargu ferte gárvvistuvvot jagi siste, danne mii doaivut oažžut buorti proseassa boazosápmelaččaiguin Norgga ja Ruoŧa bealde. Dušš dan láhkai sáhttit oažžut konvenšuvnna mii fuolaha buohkaid vuoigatvuođaid ja beroštusaid, dadjá ráđđelahttu Ellinor Marita Jåma.
Duogáš bearjadaga čoahkkimii lea Norgga-Ruoŧa boazoguohtunkonvenšuvdna maid Norgga ja Ruoŧa bealde vuolláičálle 2005:s, muhto sápmelaččaid garra eahpeduhtavašvuođa geažil ii leat konvenšuvdna nannejuvvon. Dan barggu vuođul maid mii leat ovddidan ráđđehusaide, sii válljejedje rahpat vejolašvuođa rievdadit konvenšuvnna.
-Sámiid bealis mii háliidit dál ovdánit dáinna bargguin, ja min mielas lea sámi ovttasbargu áššis rivttes lávki. Min mielas lea buorre gulahallan buohkaiguin áššis deaŧalaš vai ášši čuvgejuvvo bures ja buot áššebeliid vuoigatvuođat fuolahuvvojit konvenšuvnnas, dadjá Jåma.
-Dán muttus barggus ii leat mihkkege mearriduvvon, ja notáhta mii biddojuvvui ovdan ministtarčoahkkimis ii čana gean ge áššis. Notáhta sisdoalu mii sáhttit dál almmuhit go leat digaštallan dan iežamet ovttasbargobeliiguin. Lea deaŧalaš fuomášit ahte notáhta lea dušše vuolggasadji viidáset bargui ii ge dan galgga áddet dan láhkai ahte dat čatná áššis. Maŋŋágo mii leat gullan guoskevaš áššebeliid, de mii sáhttit dahkat oaivila das mo dat loahpalaš boađus galggašii šaddat, dadjá Jåma.
Ráđđelahttu Ellinor Marita Jåma tel. +47 916 13 460 addá eanet dieđuid.