Sámediggi ja Finnmárkku fylkkagielda vuolláičállet ođđa ovttasbargošiehtadusa guovvamánu 28. b. Šiehtadus galgá gustot áigodahkii 2013-2016 ja dan ulbmil lea buoridit ovdáneami Finnmárkkus, ja erenoamáš deattuin nannet ja čalmmustit sámi giela, kultuvrra, ealáhuseallima ja eará sámi servodateallima fylkkas.
- Ovttasbargošiehtadus lea deaŧalaš gaskaoapmi goappašiid beliide ja mun gal duođai jáhkán min ovttas juksat mihttomearimet; positiivvalaš ovdáneami Finnmárkkus, cealká Sámedikki presideanta Egil Olli.
Šiehtadusas leat čuoggát nugo háhkat geasuheaddji báikegottiid ja nu buoridit ássanhálu, ovttasbargat ealáhusaiguin ja láhčit oahpu ja oahpahusa nuoraid várás.
- Šiehtadus addá vejolašvuođa oktiiheivehit oktasaš áŋgiruššamiid, ja dás lea vuođđu gaskkustit buriid oktasaš áššiid álbmogii. Šiehtadus lea buorrin olles Finnmárkui, lohká Fylkkavárresátnejođiheaddji Ann Solveig Sørensen.
Sámegiela nannen ja čalmmusteapmi lea maiddái deaŧalaš ovttasbargosuorgi, dasa lassin áigot rahčat bisuhit ja ovddidit girjás kultureallima Finnmárkkus.
- Ássanhálu eat nagot háhkat dušše ealáhusovddidemiin ja eanet bargosajiiguin, giella ja kultuvra leat maiddái deaŧalaččat. Go beassá ássat servodagas gos sáhttá geavahit eatnigielas ja eallit iežas kultuvrrain, de loaktá olmmoš. Leage hui somá go ovttasbargošiehtadusas deattuhuvvo maiddái dát, cealká Sámedikki presideanta Egil Olli.
Dasto áigot bealit bargat dan guvlui ahte háhkat ovttaárvosaš dearvvašvuođa- ja sosiálabálvalusaid sámi álbmoga várás, mat galget seamma dásis go fylkka álbmogis muđui leat. Bealit áigot maiddái ovttasbargagoahtit ovddidit oktasaš suodjalus- ja hálddašanplána kulturmuittuide ja kulturbirrasii ja joatkit ovdánahttit areálahálddašan ovttasbarggu.
Sámedikki presideanta Egil Olli ja fylkkasátnejođiheaddji Runar Skjåstad vuolláičálliba ođđa šiehtadusa guovvamánu 28. b. 2013 Sámedikkis Kárášjogas.
Gulahallanolmmoš:
Sámedikki presideanta Egil Olli, tlf: 900 26 880
Fylkkavárresátnejođiheaddji Ann Solveig Sørensen, tlf: 926 14 685