Ovttas.no lea dál neahttasiidu mas oaidná daid sámi digitála oahppanresurssaid ja spillaid, prentejuvvon girjjiid ja fáddágihppagiid, sámi filmmaid, tv-prográmmaid ja sámi musihka, mat gávdnojit golmma sámegillii ja girjegillii.Ovttas doaimmahus lea galledišgoahtán skuvllaid, mánáidgárddiid ja giellaguovddážiid.
Sii oahpahit ohppiid ja oahpaheddjiid mo galgá geavahit portála ja juogadanarenaid. Ovttas.no lea Sámedikki ja Senter for IKT i utdanningen gaksasaš deaŧalaš ovttasbargoprošeakta dan barggus ahte fállat digitála ja ohcanvuđot visogova dain sámi oahpponeavvuin mat leat fidnemis.
-Sámi skuvla lea hárjánan ráhkadit iežaset oahpponeavvuid sámegiel oahpahusa várás. Dál galgá Ovttas.no maiddái šaddat almmuhanreaidun ja juogadanarenan skuvlaluohkáid várás, mat dál galget sáhttit bidjat dohko ávdnasiid ja juogadit daid, dadjá Sámedikki várrepresideanta Laila Susanne Vars.
Bistevaš doaibma
Proseassa sihkkarastit Ovttas bistevaš doaimma lea álggahuvvon. Jurdda lea ahte Sámi lohkanguovddáš galgá doaimmahit Ovttas boahtteáiggis. Lohkanguovddáža bargamuššan lea ovddidit sámegiela čálalaš ja njálmmálaš giellan oahpahusas ja servodagas muđui ge. Guovddážis lea fágabiras mii ovddida oahpahusa erenoamážit. Sámi lohkanguovddáš ásahuvvui bistevaš ovttadahkan 2007:s Sámi allaskuvlla vuollásažžan ja das leat dál 12 bargi.
- Sámediggi lea Ovttas.no bistevaš doaimma ášši ovddidan Máhttodepartementii ja bivdán oažžut ruhtadeami dasa. Viidáseappot mii leat váldán ovdan dárbbu oažžut einnostanvejolaš rámmaid Sámi lohkanguovddážii. Lea deaŧalaš ahte dát áidnalunddot fálaldat, mii lea ovddiduvvon máŋgga jagi strategalaš barggu čađa, sihke teknihkalaččat ja olmmošlaččat, ii jávkka, dadjá Laila Susanne Vars.
3000 resurssa maid sáhttá ohcat
Dát leat bálvalusas registrerejuvvon badjel 400 geavaheaddji ja doppe leat badjel 3000 ohcanvuđot resurssa. Govvadiehtovuđđui leat almmuhuvvon badjel 500 gova. Buohkanassii leat badjel 120 iešguđet Ovttas.no-geavaheaddji luoikkahan badjel 470 resurssa. Dál barget ovttas-prošeavttas prošeaktajođiheaddji, doaimmaheaddji, golbma prošeaktamielbargi ja julevsámi ja lullisámi jorgaleaddji. Statistihkka čájeha maiddái ahte Ovttas.no:s leat máŋggabealat geavaheaddjit. Das leat sihke dábálaš geavaheaddjit mat eai gula skuvlii, ja erenoamášpedagogat mat barget stáhtas.
- Sámi oktavuođas ferte dadjat ahte dát prošeakta lea lihkostuvvan ja šaddan resursan maiddái mealgat olggobeallai skuvlla ja oahpahusas, ja man leat fuomášan maiddái olggobealde riikkarájáid. Ovttas.no biras lea hutkái, ja mun sávan ahte ráđđehus maid atná dan árvvolažžan ja sihkkarastá dasa buoret ekonomalaš rámmaid, go dát lea mielde ollašuhttimin daid gudneáŋgiris mihttomeriid mat leat Ráđđehusa doaibmaplánas sámegiela várás, dadjá Sámedikki várrepresideanta Laila Susanne Vars.
Gulahalli:
Samedigge várrepresideanta Laila Susanne Vars, tel. +47 977 54 102