Julggaštus givssideami vuostá kampánja oktavuođas hástalii Sámediggi sámi mánáid ja nuoraid searvat plakáhtagilvvohallamii. Go áigemearri lei dievva, de leimmet ožžon evttohusaid buot luohkkácehkiid ohppiin logi iešguđet skuvllas.
Vuoitin ledje guokte lihkolaš skuvlaluohká:
- Buot ovddimusas háliidan rámidit buohkat geat ledje mielde gilvvohallamis. Buot oahppit leat bidjan ollu barggu dása ja lei oalle bargu válljet vuoiti dáid fiinna plakáhtaid gaskkas, cealká sámediggeráđđi Silje Karine Muotka.
Son lea ilus go oaidná dan stuorra beroštumi givssideami vuostá maid oahppit čájehit.
- Min mielas lea buot mánáin ja nuorain vuoigatvuohta dakkár bajásšaddan- ja oahppanbirrasiidda gos ii leat givssideapmi ja hárdin. Hui buorre lea oaidnit ahte mánát beroštit dán fáttás, go givssideapmi han guoská buohkaide. Sihke ollesolbmuide ja mánáide.
Vuoitoplakáhtat galget geavahuvvot Sámedikki barggus givssideami vuostá sihke riikkadásis ja báikkálaččat. Dán jagi nu mo ovdalis jagiid ge, searvá Sámediggi nationála kampánjii Julggaštus givssideami vuostá.
Árvvoštallangottis ledje mielde sámediggeráđđi Silje Karine Muotka, Sámedikki bajásšaddan-, fuolahus- ja oahppolávdegotti jođiheaddji Ellinor Marita Jåma, sámediggeáirras ja Sámedikki lahttu Dronnet Sonja skuvlabálkkašumi árvvoštallangotti lahttu Johan Vasara ja Sámedikki nuoraidpolitihkalaš lávdegotti (SNPL) lahttu Jon-Christer Mudenia.
