Fs Fisk AS Ivgu suohkanis oažžu 400 000 ruvdnosaš doarjaga oastit bivdofatnasa oktan bivdosiiguin ja reaidduiguin.
Fs Fisk AS lea ođđa fitnodat mii galgá rittus bivdit dakkár bodnešlájaid go dorski, sáiddi ja báldá váđuiguin, liinnáiguin ja dađistaga merddiiguin rabas joavkkus davábealde 62 gráda davvi. Bivdofanas oktan bivdosiiguin ja reaidduiguin lea vuosttašgeardde investeren.
Øst-Finnmark Fisk AS Deanu gielddas oažžu 300 000 ruvnnu oastit bivdofatnasa oktan bivdosiiguin ja reaidduiguin. Fitnodat lea ođđaregistrerejuvvon ja fanasoastin lea vuosttašgeardde investeren. Fitnodat galgá doaimmahit riddoguolásteami, muhto háliida dađistaga maiddái viiddidit fálaldaga nu ahte maiddái doaibman molssaektosaš oahppanarenan dakkár vuođđoskuvla- ja joatkkaskuvlaohppiide geain leat erenoamáš dárbbut.
– Dat illudahttá ahte olbmot áŋgiruššet. Rekrutterendárbu riddofatnasiidda Finnmárkkus lea stuoris, erenoamážit nuortan, dadjá sámediggeráđđi Silje Karine Muotka.
Sámediggeráđđi lea maid juolludan 300 000 ruvdnosaš doarjaga Deanu gildii prošektii «Utvikling av Torhop havn og etablering av sikkerhetsløsning for havneområder»
Deanu gielda lea ovddideamen Gohpi guollerusttega nannen dihtii mearrasámi vuotnaguolásteami árbevieruid. Sii leat juo divvon osiid rukkus, bierggastan bálvalusvistti lovtta rádjun, viiddidan govdunruggosajiid ja huksen hálla mii doaibmá galbmarádjun guolásteddjiide. Sii áigot dál divvut boares ja heajos oasi ja viiddidit ruggoareála čuolddaiguin ja gokčat areála gaskal dálá rukku ja bálvalusvistti. Prošeavtta gollomearri lea su. 3,5 milj. NOK.
Sámediggeráđđi juolluda maiddái 300 000 ruvdnosaš doarjaga Unjárgga gildii, fanassajiid viiddideapmái Gazzanjárgga hámmanis. Dan geažil go eanet bivdofatnasat lágidit sállaša vuostáváldinrusttegii, de lea sturron dárbu eanet sajiide gieldda govdunrukkus. Sii leat ferten cealkit eret sajiid maid eará gielddaid guolásteaddjit leat geavahan ja geat buktet sállaša Gazzanjárgga guollevuostáváldinrusttegii. Sis leat dál nuorra aiddo álgán guolásteaddjit geat leat vuordinlisttas oažžut saji govdunruggui. Danne áigu Unjárgga gielda ásahit ođđa govdunrukku mas leat 5-6 bivdofanassaji vai sáhttet fállat sajiid nuorra guolásteddjiide ja maiddái sajiid guolásteddjiide mat bohtet eará sajiin.
– Dát mearkkaša ollu boahtteáiggi rekrutteremii guolástanfidnui. Dat lea maid mielde buorideamen álgoávnnasfidnema guollevuostáváldinrusttegiidda ja nu dat sihkkarastá viidásat doaimma ja barggolašvuođa, dadjá sámediggeráđđi Silje Karine Muotka.
Doarjagat leat juolluduvvon doarjjaortnegis Doarjagat vuođđoealáhusaide 2019.
Gažaldagaid dahje jearahallama várás, váldde oktavuođa sámediggeráđiin Silje Karine Muotka, mob. +47 984 87 576, silje.karine.muotka@samediggi.no