PRD: Addá doarjaga lullisámi deaivvadansadjái

Sámediggeráđđi juolluda 50 000 ru. doarjjan lágideapmái Sjeltie 2019 – Maajehjaevrie sámi kultur- ja giellaarenan, mii lágiduvvui mannan geasi.

Sjeltie 2019 lea Sjeltie 2018 joatkka, mii čalmmustahtii Maajehjaevrie organisašuvdnahistorjjálaš arenan. Lullisámegielsátni sjeltie mearkkaša girkobáiki, čoakkalmas, márkanbáiki.

Maajehjaevrie ja nu gohčoduvvon Majavass-čoakkalmas lea doloža rájes leamaš boares sjeltie, girkosadji ja Nååmesjevuemie ja Helgelándda-guovllu sápmelaččaid deaivvadansadji. Sjeltie lágideaddjit háliidit fas ealáskahttit dan lullisámi árbevieru ahte deaivvadit Maajehjaevries mihcamáraide, ja dahkat Sjieltie árjjalaš ja ealli kultur- ja gaskkustanarenan.

– Sjeltie 2019 ovddasta dehálaš deaivvadansadjin Maajehjaevrie-guovllu lullisápmelaččaide, ja gieđahallá sámi servodahkii guoskevaš fáttáid, dadjá sámediggeráđi Berit Marie E. Eira.

Dan oktavuođas go jahki 2019 lea álgoálbmogiid riikkaidgaskasaš giellajahki, de čalmmustahtii Sjelte 2019 sámegiela. Doppe lágiduvvojedje sihke kurssat ja fáddáeahkedat sámi biepmu birra daidda nuoraid várás geat orrot láigolanjain, máŋga logaldallama earret eará sámegiela ja gielladutkama birra, sosiála ovttastallamat sámi biepmuin, ja sámi ipmilbálvalus sotnabeaivvi. Doaluin ledje 40 oassálasti ja lágiduvvojedje Sjeltie iežas lanjain Maajehjaevries.

50 000 ruvdnosaš doarjja lea juolluduvvon Regionála ovddidanprošeavttaid doarjjaortnegis. Sjeltie 2019 lea maid ožžon 50 000 ru. sturrosaš doarjaga Nordlándda fylkkasuohkanis ja nu dat ollašuhttá regionála ovddidanprošeavttaid doarjjaeavttuid.

Jearahallamiid dahje gažaldagaid várás, váldde oktavuođa sámediggeráđiin Berit Marie P.E. Eira, +47 913 28 626, berit.marie.eira@samediggi.no