- Báhpára alde dat orru leamen buorre, muhto duohtavuođas dat lea vuolideapmi. Juolludeamit eai govčča bálká- ja haddegoargŋuma Norggas, ja mii leat sakka beahttašuvvan. Dat vuolggaha maid dan eahpádusa ahte sáhttá go Sámediggi bisuhit dan doaimma mii dál lea. Erenoamážit lea Gielda- ja ođasmahttindepartemeanta (GOD) mii addá nuppiin gieđain, muhto váldá fas nuppiin, dadjá ráđđelahttu Henrik Olsen, geas lea bušeahttaovddasvástádus sámediggeráđi bealis.
Son čujuha dasa ahte gieldaministtar lohpida 15,5 miljon ruvdnosaš lassáneami seammás go sii vuolidit juolludusaid 10 miljon ruvnnuin go gesset ruovttoluotta ruđaid mat ovdal leat juolluduvvon Stoltenberg II Kulturloktema bokte.
- Dattetge illudahttá go giella, mánáidgárdi ja oahpponeavvut leat nannejuvvon bušeahtas. Muhto dat bohtet merkejuvvon ruhtan, mii fas mearkkaša ahte Sámediggi oažžu uhcit ja uhcit doaibmanfriijavuođa ja uhcit iešmearridanvuoigatvuođa, dadjá Olsen.
Sámedikkis ledje stuorra vuordámušat dasa ahte Saemien Sijte ja Beaivváš galge boahtit mielde dán bušehttii, ja lea sakka beahttašuvvan go nu ii geavvan.
- Dát čájeha ahte ráđđehusas lea uhccán dáhttu hukset sámi kulturvisttiid ja mii fertet váldit oktavuođa Stuorradikkiin, dadjá Olsen.
Sámediggeráđđi áigu maid váldit ovdan Stuorradikkiin juolludemiid birra duohtavuođakommišuvnna barggu álggaheami birra.
Gánnáheapmi boazodoalus nannejuvvo go evttohuvvo ahte ii dárbbaš máksit divat go oastá doallobiergasiid.
- Vaikke vel dat ii guoskka Sámedikki bušehttii, de dat lea hui buorre buot boazosápmelaččaide ja ealáhussii, dadjá Olsen.
Jearahallamis sáhttá sámediggeráđđi Henrik Olsen vástidit. Tel. 907 75 219