Dan dadjá sámediggeráđđi Berit Marie P. Eira. Su mielas dás leat ovdamearkkat menddo dávjá, maŋimusat ovddit vahkus go albbas gottii 26 sávzza guovtti doalus Návuonas Romssas.
Sámediggeráđđi dovddaha miehtemiela sávzaboanddaide Návuonas geaidda buhttetkeahtes vahágat leat čuohcan ovddit vahkus. Dovddahit miehtemiela maiddái eará dolliide geat gillájit vahágiid dihtii maid boraspiret dagahit birra jagi, ja erenoamážit sidjiide geat dušše maŋimuš dálvvi leat beaivválaččat ferten oaidnit go oassi sin eallinvuođus manná boraspiriide.
– Sáhttá dušše jurddašit makkár eahpedoaivu lea sis geat vásihit dákkár diliid. Sávza- ja boazodoallu eai galgga dárbbašit heivehallat ollu boraspiriide ja vahágiidda maid boraspiret dagahit, dadjá Eira.
Eira lea fuolas danne go Sámediggeráđđi fas ferte guohtonealáhusa bealis čujuhit ahte dál lea hoahppu rievdadit boraspirepolitihka nu ahte boraspiret eai nu ollu šat vaháguhtáše guohtonealáhusaid.
– Mun lean duhtavaš go lea addojuvvon njeaidinlohpi Návuonas, ja doaivvun ahte johtilit njeaidimat jotkojuvvojit, erenoamážit dalle go bohccuid ja sávzzaid guottetáigi álgá muhtun mánuid geahčen, dadjá Eira.
Son oaivvilda boraspire falleheamit Návuonas leat fas okta mearka das ahte boraspiret leat menddo ollu sámi guovlluin. Boraspireeiseválddiid dieđuid mielde eai leat albbasnállemihtut juksojuvvon eai Norlándda guovllus eaige Romssas/Finnmárkkus. Finnmárkkus eai leat boraspireeiseválddit nagodan registreret ovttage albbasčivgga 2017:s.
– Sámediggi guorrasa dasa ahte dát logut eai dávis dasa maid boazodoallit ja sávzaboanddat ieža muitalit. Logut leat stuorát go maid eiseválddit leat nagodan registreret. Danin ii sáhte otnáš nationála boraspirepolitihkain jotkojuvvot. Boraspirevahágiid ferte geahpedit ja boraspiriid registreren ferte buoriduvvot, dadjá Eira.
Gulahallan: Sámediggeráđđi Berit Marit P.E. Eira, +47 913 28 626