Sámedikki dievasčoahkkin lea mannan vahkus meannudan ášši sámi spesialistadearvvašvuođabálvalusa ovddideami ja organiserema birra.
Áššis váldojuvvo vuolggasadji guovddáš eiseválddiid bargguin Davvi Dearvvašvuhtii ahte galget gozihit sámi álbmoga spesialistadearvvašvuođabálvalusa strategalaš viidáset ovddideami. Sámediggi lea duhtavaš go dát bargu lea álggahuvvon. Dán barggu bokte dohkkehit guovddáš eiseválddit dan ahte sámiin leat sierra dárbbut ja iežas lagadeamit sin dearvvašvuhtii man geažil sii galget beassát deaivvadit sin gillii, kultuvrii ja servodateallimii heivehuvvon dearvvašvuođadoaimmahagain.
Dál leat sámi dearvvašvuođaásahusat sihke ekonomalaččat ja organisatoralaččat dearvvašvuođadoaimmahaga vuollásaččat, ja dain lea unnán váikkuhanfápmu iežaset resurssaide ja sin stivrejupmái. Sámediggi oaivvilda ahte duohta sámi ieš- ja mielmearrideapmi ferte gozihuvvot stivrejeaddji orgánain, ja dearvvašvuođabálvalusaid plánemis, hábmemis ja organiseremis sámi pasieanttaide.
Sámediggeráđđi Mikkel Eskil Mikkelsen
– Bajimuš organisašuvdnastruktuvra ferte dohkkehit ahte sámiin lea iešmearridanvuoigatvuohta. Iešmearridanvuoigatvuohta hábmemis, stivrejumis ja bearráigeahčus, ferte leat vuođđun láhččojuvvon dearvvašvuođa bálvalusaid organiseremii sámi pasieanttaide, dadjá sámediggeráđđi Mikkel Eskil Mikkelsen.
Sámediggi oaivvilda ahte lea dárbu geahčadit lagabuidda movt sámi dearvvašvuođa bálvalusat galggašedje organiserejuvvot, nu ahte sámi dearvvašvuođa bálvalusat livčče sámi pasieanttaid olámuttus miehtá riikka.
– Mii fertet geahčadit dearvvašvuođadoaimmahatmálle. Spesialistadearvvašvuođabálvalusaid ulbmillaš organiseren galgá bajimuš dásis sihkkarastit dan ahte buot sámit ožžot daid bálvalusaid maidda sis lea vuoigatvuohta, dadjá Mikkelsen.
Sámediggi oaivvilda ahte sámi fágaresurssaid oktiiordnen lea deaŧalaš momeanta dán barggus. Galggašii ásahuvvot sámi fágafierpmádat gieldarájáid ja spesialistadearvvašvuođabálvalusaid rastá maid bokte sámi pasieanttat čuovvuluvvojit.
Mikkelsen čujuha maiddái ahte leat unnán sámi fágaolbmot. Sámi álbmot lea sorjavaš organisašuvdnahámis mii dahká ahte sáhttá geavahit sámi fágaolbmuid nu njuovžilit go vejolaš.
– Dárbu lea jurddašit ollislaččat ja bajimuš dásis Spesialistadearvvašvuođabálvalusaid organiserema sámi álbmoga várás vai sáhttá addit buoret ja eanet ollislaš bálvalusaid sámi pasieanttaide sámi giela ja kultuvrra vuođul, dadjá Mikkelsen.
Jearahallama addá sámediggeráđđi Mikkel Eskil Mikkelsen, tel. +47 917 42 161.