Válgačoahkkin vállje sámi ovddasteddjiid bismagodderáđiide Davvi-Hålogalánddas ja Mátta-Hålogalánddas ja nominere lahtuid Sámi girkoráđđái. Sámi girkolaš válgačoahkkin čoaggana juohke njealját jagi ovddabealde girkoválggaid, vuosttaš gearddi ovdal Girkoválgga 2019.
Sámediggeráđđi Mikkel Eskil Mikkelsen
– Girkočoahkkin lea válljen čielga háltti. Norgga Girkus lea fokusis sámi demokratiija ovddideapmi. Girku buvttiha arena maiddái sámi girkoeallimii gos áigeguovdilis áššiid ja fáttáid birra sáhttá ságastit, seammás go válgačoahkkimis lea čielga mandáhta evttohit sámi ovddastusa girkolaš lávdegottiide, dadjá Mikkelsen.
Ortnega revideremis bismmaid válljema ektui Norgga Girkus, mearridii Girkočoahkkin ahte Sámi girkoráđđi oažžu jienastanrievtti bismma ráđđeaddi jienasteamis Davvi-Hålogalándda, Mátta-Hålogalándda, Nidaros, Hamar, Møre ja Oslo bismagottiin.
– Erenoamáš illudahtti lea oaidnit go gažaldagat mieldemearrideamis gozihuvvojit. Okta lávki ovddos guvlui lea dat go Sámi girkoráđđi oažžu bismma nammadanrolla, dadjá Mikkelsen.
Sámediggeráđđi Mikkelsen sávvá maiddái lihku Sara Ellen Anne Eirai, gii Girkočoahkkimis cuoŋománu 14. b. válljejuvvui fas ráđđejođiheaddjin guovtti ođđa jahkái.
Jearahallama addá dahje vástida gažaldagaide sámediggeráđđi Mikkel Eskil Mikkelsen, tel. +47 917 42 161