Sámediggeráđđi juolluda 230 000 ruvnnu Gollegiella lágádussii davvisámi diktagirjji Ándagassii Sápmi almmuheapmái. Lea Ánne Márjá Guttorm Graven gii dán diktagirjji lea čállán, mii lea jurddašuvvon nuoraide ja ollesolbmuide. Girjjis leat fáttát mat gusket nuoraid hástalusaide eallimis, nugo ovdamearkka dihte iešsoardinproblematihkka.
– Girjjis lea áigeguovdilis ja deaŧalaš fáddá, dadjá sámediggeráđi Henrik Olsen.
Graven lea searvan Čális fal čálliohppui, main Sámediggi ovttas Sámi girječálliid servviin/Sámi dáiddárráđiin lea lágidan.
– Mii dárbbašit eanet sámi girječálliid, ja mun lean ilus go fas oaidnit ahte oažžut buriid mánusiid sis geat čađahit Čális fal, dadjá Olsen.
Doarjja mánáidgirjjiide
Sámediggeráđđi lea maid juolludan 305 000 ruvnnu doarjaga Bárus SA lágádussii, guovtti girjái Nilla ja Ádegáhtu birra, maid Jens Martin Mienna lea čállán. Girjjit leat jurddašuvvon mánáide golbma ja gávcci jagi gaskka.
– Mienna lea ásahuvvon girječálli geas lea earenoamáš ja gelddolaš čállinvuohki. Danne lea hávski go beassat doarjaga addit ođđa mánáidgirjjiide maid son lea čállán. Sámegillii leat unnán girjjit smávvamánáide main leat luŋkkát ja eará válljenvejolašvuođat, ja danne váldit dáid girjjiid buriin mielain vuostá, dadjá Olsen.
Dasto oažžu Trööndelagen fylhkengærjagåetie/Trøndelag fylkesbibliotek 300 000 ruvnnu doarjaga joatkit barggu bivnnuhis mánáidgirjjiid jorgalit máttasámegillii. Dál leat plánain 17 tihttela, ja lea vuoruhuvvon mihttomearri almmuhit eanet girjjiid boarresat mánáide ja nuoraide. Váldoáššis lea jietnagirjjid jorgaleapmi máttasámegillii guovddážis, muhto dán jagi leat julev- ja bihtánsámi jorgaleamit maid plánejuvvon.
– Lea buorre veahkki girjjálašvuođa dahkamin olámuddui earenoamážit máttasámegillii, muhto maiddá eará sámegielaide, dadjá Olsen.
Ođđa ohcanáigemearri čakčat
Ođasin dán jagi lea go Sámedikkis dán jagi leat guokte ohcanáigemeari sámi girjjálašvuođa almmuheapmái. Boahtte ohcanáigemearri sámi girjjálašvuođa buvttadeami doarjjaortnegis lea golggotmánu 1. beaivvi 2019.
– Mii doaivut oažžut máŋga buori ohcama nuppi vuorus maid, lohká Olsen.
Ohcanvuđot ortnegis girjjálašvuođa buvttadeapmái sáhttet lágádusat dahje fitnodagat ohcat mat eai oaččo njuolggadoarjaga lágádusdoibmii. Sámediggi lea 2019:s maid juolludan njeallje miljovnna ruvnnu njuolggadoarjjan sámi lágádusaide sámi girjjálašvuođa almmuheapmái.
Gažaldagaid ja jearahallama oktavuođas, váldde oktavuođa sámediggeráđiin Henrik Olseniin, tlf +47 907 75 219