Dáiddár Máret Ánne Sara Guovdageainnus dahká stuorra ja gáibideaddji dáiddabuktagiid, ja son vásiha maiddái ahte ollugat jearahit su bargguid. Sámediggeráđđi juolluda 490.000 ruvnnu dáiddárii dáiddastudio ásaheapmái.
– Dáiddastudio attášii Máret Ánne Sarai stuorát dáiddalaš friijavuođa, son sáhttá bargat máŋggain ja stuorát prošeavttaiguin oktanaga ja dat sáhttá addit sutnje stuorát einnostan vejolašvuođa, dadjá sámediggeráđđi.
Dáiddár Máret Ánne Sara háliid dáiddastudioin profešonaliseret ja beavttálmahttit iežas fitnodaga ja buvttadeami. Sara kundárat leat Nationálamusea rájes priváhta aktevrraide máilmmis.
Gánnáhahtti hutkás ealáhus
Sámediggi oaivvilda ahte Sápmi dárbbaša eanet gánnáhahtti ja gievrras aktevrraid hutkás ealáhusa siskkobealde, maid Máret Ánne Sara ovddasta.
– Mun lean ilus go mii sámediggeráđi beales sáhttit leat mielde dán ovdáneamis juksan dihtii dán lága mihttomeari. Dasto lea hui gelddolaš čuovvut mielde Máret Ánne Sara ja su fitnodaga, dadjá sámediggeráđđi Silje Karine Muotka.
Jearahallama addá sámediggeráđđi Silje Karine Muotka, tel: 984 87 576.