Henrik Olsen (Foto: Kenneth Hætta)
Earret eará lea Vuođđudus Sámi musihkkafestivála Guovdageainnus ožžon 200 000 ru doarjjan boarráset Sámi Grand Prix-lávlagiid ođđasis almmuheapmái.
Vuođđudus Sámi musihkkafestivála dagai dan 2019:s dan oktavuođas go Sámi Grand Prix vuosttaš gearddi lágideames lei gollan 30 jagi. Jurdda lea ahte nuorra artisttat ja buvttadeaddjit ráhkadit ođđasis boares lávlagiid ja sis ledje sihke almmuheamit ja konsearttat gos dát ovdan buktojuvvojedje. SMF oaidná dál vejolašvuođa bargat konseapta ovddidemiin, sihke loktet bajás ođđa, nuorra artisttaid ja buvttadeddjiid, muhto maiddái ovttas bargat eará sámi festiválaiguin – dán vuoru Márkomeanuin.
– Dát lea gelddolaš prošeakta mii lea mielde ovddideamen sihke Sámi musihkkafestivála ja Márkomeanuid, dál go dat leat ovttasbargoguoimmit prošeavttas. Dasa lassin lea dat mielde loktemin luođi ollu lávddiin, go lea ásahuvvon ovttasbargu earret eará Riikalávddiin, dadjá sámediggeráđđi Henrik Olsen (NSR).
Dasa lassin galgá Vuođđudus Sámi musihkkafestivála 2020:s fokuseret nissonbuvttadeddjiid rekrutterema ja galgá bargobáji ja bagadeddjiid bokte ovddidit máŋga musihkkabuvttadeami Sámis.
– Dat go fokusis lea rekrutteret eanet musihkkabuvttadeddjiid, ja erenoamážit nissonbuvttadeddjiid, oaivvilda ahte dát lea prošeakta, mii veahkeha ovddidit sámi artista- ja dáiddabirrasa oppalaččat Sámis. Dát lea buorre ovdamearka das, movt mii háliidat oaidnit ahte min sámi ásahusat leat mielde buorideamen gelbbolašvuođa maiddái olggobealde iežamet ásahusaid.
Doarjja sámi girjjálašvuođa almmuheapmái
Sámediggeráđđi lea addán doarjaga maiddái sámi girjjálašvuođa almmuheapmái. Earret eará addojuvvui 331.000 ru doarjja Solum Forlag AS:ii Kathrine Nedrejord romána “Det Sara skjuler” jorgaleapmái.
– Kathrine Nedrejord lea girječálli gii čállá fáttáid maid birra lea váttis hállat. Dán nuoraidrománas lea fáddán veahkaváldin ja vearredagut mat dáhpáhuvvat feasttaid maŋŋá, ja girjji muitalusat dáhpáhuvvet Kárášjogas. Girji lea juo ožžon buori kritihka ja mii doaivut ahte dát sáhtášii buvttihit ságastallama fáttá birra go dat almmuhuvvo maiddái davvisámegillii, dadje Olsen.
Boahtte ohcanáigemearri doarjjaortnegis sámi girjjálašvuođa buvttadeapmi, lea njukčamánu 1. b. 2020. Doarjjaortnegis kulturdoaibmabijuide lea rabas ohcanáigemearri.
Gažaldagaide vástida ja/dahje addá jearahallama sámediggeráđđi Henrik Olsen (NSR), tlf. +47 907 75 219