Jo Ánde Bongo Dikkanen (priváhta govva)
Sámediggeráđđi attii 300 000 ru doarjjan Jo Ánde Bongo Dikkanenii, 200 000 ru fatnasii mii lea 31 juolggi guhkkosaš, ja doarjja reaidduid ja dávviriid oastimii, nugo firpmiid ja liidnadávviriid.
Dikkanen lea nuorra 21 jahkásaš guhte ulbmildiđolaččat áigu áŋgiruššat ealáhusas mii maŋimuš jagiid lea sakka ahtanuššan juste Unjárgga gielddas.
Sámediggeráđđi Silje Karine Muotka dadjá ahte Sámediggi háliida ahte riddolagaš fatnasiin galgá leat vejolašvuohta ahtanuššat ja ovdánit mearrasámi guovlluin.
– Dalle fertet mii doarjut nuorra guolásteddjiid geat háliidit áŋgiruššat. Dát lea deaŧalaš maiddái go jurddašit ođđarekrutterema guolástusámmáhii. Dat nannešii maiddái ássama, árvoháhkama ja barggolašvuođa mearrasámi guovllus. Doarjja nuorra guolásteaddjái Unjárggas lea okta buorre ovdamearka álggalaš ja ulbmildiđolaš miellaguddui háhkat boahtteáiggi guolástusealáhusas, ja maid Sámediggi vuoruha doarjut, dadjá duhtavaš Silje Karine Muotka.
Jus leat gažaldagat dahje áiggut jearahallama, váldde oktavuođa sámediggeráđiin Silje Karine Muotka, mob. +47 984 87 576