Sámedikki mihttomearri lea ovddidit duoji boahtteáigái heivehuvvon ja geasuheaddji ealáhussan sámi guovlluin. Sámedikki okta deaŧaleamos reaidduin duoji ovddideamis lea Duoji ealáhusšiehtadus, maid duodjeorganisašuvnnat Sámedikkiin šiehtadit.
Doaivu buori ovddideami
Duoji 2017 ealáhusšiehtadusa bealit sohpe bidjat kr 900 000 mearkagálvoprošeavttaide maid Sámiid Duodji ja Duojáriid Ealáhussearvi sáhttet ohcat. Sámediggi oaivvilda ahte dát prošeakta sáhttá leat mielde váikkuheamen ahte joksat mihttomeari.
– Mii doaivut ahte dát šattašii buorren ovddideapmin duojáriidda, ja ahte dát sihkkarasttášii sin ealáhusa, dadjá sámediggeráđđi Berit Marie P.E. Eira.
Odne eai leat duojis eará mearkagálvoorganisašuvnnat Norggas. Mearkagálvoorganisašuvdna galgá doaimmahit márkanastima ja vuovdima válljejuvvon duojáriid ovddas.
Duddjomiin galgá sáhttit eallit
Mihttomearrin mearkagálvoáŋgiruššamiin MIS of Sápmi lea ráhkadit gánnáhahtti ja ceavzilis fitnodagaid. Dat mearkkaša ahte buvttadeaddjit galget duoji buvttademiin eallit.
Seammás háliida Duojáriid Ealáhussearvi ahte mearkagálvoáŋgiruššan galggašii buktit máhttogaskkusteami sámi kultuvrra, eallinvuogi ja eallinvuođu birra. Dan sáhttá dahkat go oahpásmahttá sámi duoji olggobeali márkaniidda.
– Sámediggeráđđi áigu mielas čuovvut ovddideami maid mearkagálvoáŋgiruššan buktá, dadjá Eira.
Gulahallan: Sámediggeráđđi Berit Marie P.E. Eira, mob. +47 913 28 626.