Go deaŧalaš fáhkkaveahkki ii doaimma fálaldatmoivvi geažil, de dilli lea dohkketmeahttun, oaivvilda Keskitalo.
– Sámediggeráđđi oaivvilda ahte kvalitehta ja oadjebasvuohta fáhkkabálvalusas galgá leat fokusis, ja nugo otná čoavddus lea, de ii leat dohkálaš álbmogii davvin. Álbmot ferte diehtit ahte bálvalus lea fidnemis go lea dárbu, dadjá Keskitalo.
Sámediggeráđđi oaivvilda ahte nugo dilli lea dál, de ii leat álbmogis buorre sihkarvuohta proseassaid geažil. Davvin leat guhkes gaskkat mii mearkkaša dan ahte leat sorjavaččat áibmoambulánsabálvalusas, mii lea deaŧalaš oassi gearggusvuođas Davvi-Norggas.
– Čielggas lea ahte vuogádagas leat bonjuvuođat maid ferte njulget jođáneamos lági mielde. Dan ferte njulget dalán, seammás go fuolahit ahte oažžut guhkes áiggi ja einnostahtti čovdosiid sadjái. Sámediggeráđđi bivdá ahte gávdnoše čovdosat mat eai váikkut fálaldahkii, dadjá sámediggepresideanta Aili Keskitalo.
Jearahallama addá presideanta Aili Keskitalo, +47 971 29 305
Govaid Keskitalos gávnnat dáppe. Daid oažžu friddja geavahit go kreditere govvejeaddji.