Ovdaprošeavtta ulbmilin lea gárvvisin prošekterejuvvon visti. Visti galgá ceggejuvvot hui lahka skuvlla ja goanstarássešillju Ájluovttas Divttasvuonas.
Dál leat buot aktivitehtat valáštallansálas Ájluovtta skuvllas, gos lea hui gárži. Ájluovttas lea árjjalaš valáštallanbiras, ja dárbbašuvvo deaivvadanbáiki olbmuide ja eanet fálaldagat mánáide ja nuoraide. Visotvistti sisdoallu lea dábálaš hálla maid juohkelágan valáštallamat sáhttet geavahit.
Visotvisti galgá maiddái leat nuoraid deaivvadanbáiki lassin sieiva valáštallamii, earret eará musihka, dánsuma ja lávdedáidaga hárjehallanlatnjan. Kultur- ja birasoassi Visotvisttis lea seamma deaŧalaš go valáštallanoassi. Dasa lassin galgá maiddái hábmejuvvot stuorra gievkkan visotvistái.
– Nugo diehtit, de lea gievkkan sámi ruovttus váibmu ja danne illudahttá oaidnit go plánejuvvo ahte visotvisti galgá geavahuvvot máŋggalágan doaimmaide lassin valáštallamii. Mii diehtit earret eará ahte gávdno árjjalaš mánáid dánsunbiras Ájluovttas ja jos sii ožžot alcceseaset doaibmaareálaid, de illudahttá dat sakka ja dat lea deaŧalaš dadjá sámediggeráđđi Silje Karine Muotka.
Visotvisti galgá maiddái doaibmat nuoraid deaivvadanbáikin eahkedis, nugo báikkálaš e-sport, dahje gaming.
Vuolggasadji lea ahte (Ođđa) Hápmira suohkan eaiggáda, lea hukseheaddji ja jođiha visotvistti, muhto gieldda čavga ekonomiija geažil galgá eanaš dárbbašlaš kapitála vižžojuvvot priváhta sponsoriin.
– Visotvisti lea seamma ollu kulturprošeakta go valáštallanprošeakta, ja guovllu álbmot dárbbaša deaivvadanbáikki, dál go Ájluokta gos eanaš olbmot leat sámit, šaddá oassin ođđa gielddas, dadjá Muotka.
200.000 ruvdnosaš doarjja lea juolluduvvon doarjjaortnegis Doarjja regionálaovddidanprošeavttaide.
Gažaldagaide vástida dahje addá jearahallama sámediggeráđđi Silje Karine Muotka, mob. +47 984 87 576, silje.karine.muotka@samediggi.no