Maŋimuš stuorradiggedieđáhus boazodoalu birra bođii 1992:s. Odne ovdan buvttii eanadoallo- ja biebmoministtar Jon Georg Dale ođđa stuorradiggedieđáhusa boazodoalu ceavzilvuođas.
– Dás lei ráđđehusas vejolašvuohta njulget boazodoallopolitihka, mii guhkes áiggi lea leamaš boastut. Dan sadjái oaidnit mii ahte ain biddjojuvvo vuođđun politihka ovddideapmái eiseválddiid bearráigeahččan- ja regulerendárbu, dadjá Magga.
Sámediggi lea guhká čujuhan ahte boazodoalu sadji guovddáš sámi kulturguoddin ferte leat vuolggasadjin boazodoallopolitihka hábmemis. Ollu dutkit geat leat dutkan sámi boazodoalu leat čujuhan ahte čađamanni dovdomearka áiggiid badjel norgga boazodoallohálddašeamis lea leamaš ahte das váilu árvovuođu, sámi doaibmavugiid ja máhttovuođu ipmárdus.
– Ráđđehus orru eanemusat berošteamen sámi boazodoalu detáljareguleremis. Ealáhusovddideapmi ja doaibmabijut boazosámiide bohtet nuppi sadjái. Go ráđđehusas lea deaŧaleamos áigumuš bearráigeahččat boazologu elektronalaš čippaiguin ja láhkii čatnat vuoigatvuođa almmolaččat almmuhit boazologu, de lea áigumušdássi njulgestaga doaivvuheapmi, konstatere Magga.
Sámediggi lea maiddái hui sakka beahttašuvvan go ráđđehusas lea nu unnán áigumuš sihkkarastit areálavuođu. Boazodoallu luondduvuđot ealáhussan lea sorjavaš guohtonareálain jos das galggaš leat boahtteáigi.
– Boazodoalu stuorámus hástalus lea sihkkarastit areálavuođu. Stuorámus áitta boazodoalu ceavzilvuhtii lea ahte areálaide bahkken lassána, duohtadeamit nugo huksemat ja johtaleapmi lassánit, čujuha Magga.
– Mun oaivvildan ahte doaibmabijut mat čatnasit areálahálddašeapmái maid ráđđehus dál ovdan bidjá, eai leat doarvái ceavzilis boazodoalu sihkkarastimis boahtteáigái. Dat go ráđđehusas váilu dáhttu sihkkarastit boazodoalu guohtonvuođu, ii dávis álggage dan prosessii mii lea jođus boazologu geahpedemiin, deattasta Magga.
Ráđđehus dieđiha ahte áigu vuoruhit ekologalaččat ceavzilvuođa boazodoallolága ulbmilparagráfas. Sámediggi oaivvilda ahte dán lágan vuoruheapmi eaktuda ahte lea nana fokus areálaid sihkkarastimii ja boraspirevahágiid geahpedeapmái, iige oktageardánis fokus boazolohkui.
– Ekologalaš, ekonomalaš ja kultuvrralaš ceavzilvuođa oktavuođa deattuheapmi livččii bidjan áibbas eará fokusa nie deaŧalaš politihkalaš dokumeanttas, ja boazodoalu sihkkarastimii go dat lea álgoálbmotealáhus, dadjá Mariann Wollmann Magga loahpas, gean mielas lea buorre go Norgga Boazosápmelaččaid Riikasearvi ja Sámediggi ovttas departemeanttain galget geahčadit lagabuidda ceavzilvuođa mihtuid.
Jearahallan, váldde oktavuođa sámediggeráđiin Mariann Wollmann Magga, tel. 977 02 350.
Dás sáhttá lohkat eanet ođđa stuoradiggedieđáhusa birra.