Doarjja 129 000 ru manná ovttaolbmofitnodahkii Make my day Vuotnabađas. Oamasteaddji lea oahppan liikedikšu, make up-artista ja gazzahábmejeaddji. Ohcci lea doaimmahan vásttolaš doaimma ollu jagiid Oslo guovllus, ja áigu dál áŋgiruššat iežas ruovttugielddas Unjárggas. Áiggi mielde háliida son láhčit eanet dikšunfálaldaga, eanet bargiid ja ovttasbargoguimmiid. Doarjja galgá geavahuvvot ođđa lokála stohpogálvvuide, ja ođđa dikšundávviriidda.
- Ohcan gullá min mearriduvvon vuoruhemiide Sámedikki 2020 bušeahtas, maiddái doaibmabijuide mat ollu váikkuhit ođđaháhkama ja fitnodatovddideami, dadjá sámediggeráđđi Silje Karine Muotka (NSR)
Doarjja 78 500 ru manná buvttadanfitnodaga Lykkeliten Babynest ásaheapmái Buvrovuonas, Návuonas. Fitnodat galgá ráhkadit erenoamážit heivehuvvon unnamánáža veallánvuložiid (babynest), doahttodoalaniid ja eará unnamánážiidda gullevaš dávviriid vánhemiidda geat leat dihtomielalaččat design ektui. Buktagat galget vuvdojuvvot interneahtas nationála márkanii.
Dán fitnodaga birra dadjá sámediggeráđđi ahte “ohcci gullá Buvrovutnii, Návuonas. Dát gullá STN-guvlui, ja ohcci kvalifisere dieinna lágiin geográfalaččat oažžut doarjaga juohkelágan ealáhuseallimii. Dávvirmárkanat unnamánážiid várás Norggas leat stuorrá ja ollugat geavahit ollu ruđaid dán lágan dávviriidda. Jurdda lea vejolašvuohta sáhttit ásahit eallineaktofitnodaga Návuonas.
Issat Ovlla Varsi, Sirpmás Deanu gielddas oažžu 145 000,- ru náveha divvumii.
Varsi áigu boahtteáiggis bargat boandan, ja lihttoláigoha doalu mii galgá geavahuvvot burruid biebmamii njuovvama várás, ja cegget NRF-guigguid ealiheami várás. Burrut vuvdojuvvojit Norturai, ja guiggut mielkeboanddaide. Doarjja manná dáláš visttiid divvumii ja laktavistái.
- Ohcan gullá vuoruhemiide doarjagis eanadollui Sámedikki bušeahtas. Áššis lea sáhka nuorra olbmos gii áigu bargat boandan boahtteáiggis. Prošeakta buvttiha rekrutterema ja árvoháhkama eanadoalus Deanu gielddas, dadjá sámediggeráđđi Silje Karine Muotka.
Eanet dieđuid dahje jearahallama addá sámediggeráđđi Silje Karine Muotka (NSR), tel. 984 87 576 dahje e-poasta: silje.karine.muotka@samediggi.no