Lávvordaga juovlamánu 14. beaivvi lea Jikŋon 2-filmma almmolaš ovdapremiere Norggas. Davvisámegielat veršuvdna Frost 2 filmmas lea njuolggoboađus buori ovttasbarggus Norgga, Ruoŧa ja Suoma Sámedikkiid, Sámeráđi ja Walt Disney Animation Studios gaskkas. Sápmelaččaid bealis lea leamaš dehálaš sihkkarastit ahte sámi kultuvra mas filbma lea viežžan inspirašuvnna, meannuduvvo gudnejahttimiin ja dohkkehemiin.
Davvisámegiel veršuvdna biddjojuvvo máŋgga kinoi olles riikkas dán vahkkoloahpa, nugo ovdamearkka dihte Troanddimis, Rørosis, Romssas ja Leavnnjas. Máŋgga sajis, nugo Álttás ja Čáhcesullos, vuvde buot bileahtaid davvisámegiel čájeheapmái dušše moadde diimmu maŋŋel go ledje vuovdigoahtán daid.
– Lea hui somá go sámegiel čájehemiin leat bileahtat buot vuvdojuvvon nu máŋgga sajis, muhtin sajiin maiddái ovdalii norgga veršuvnna. Dat čájeha ahte lea márkan sámi filbmii kinos, dadjá sámediggepresideanta Aili Keskitalo.
Feastavuoigŋa kinoin
Olu sámediggeáirasat, sámi artisttat, neavttárat ja dáiddádat geat leat leamaš mielde filmmas, bohtet leat ávvupremieras Oslos. Sámedikki direktevra Rune Fjellheim, gii lea leamaš Sámedikkiid ja Sámeráđi oktavuođaolmmoš Disney Animationiin, lea maid searvame rukses rátnu-premieras oaivegávpogis.
Sámediggeráđđi Berit Marie E. Eira searvá ovdapremierii Guovdageainnus 14.12, sámediggeráđđi Henrik Olsen searvá ovdapremierii Romssas 14.12, sámediggeráđđi Mikkel Eskil Mikkelsen searvá ovdapremierii Bådåddjos 14.12, ja sámediggeráđđi Silje Karine Muotka searvá ovdapremierii Čáhcesullos 15.12. Šaddet iešguđet doaimmat iešguđet kinoin, rukses ránuin, spáiddáriiguin, guoimmuhemiin ja vuoittuiguin.
Vuordá eanet stuora filmmaid sámegillii
Sámediggepresideanta Aili Keskitalo lea juo oaidnán dan amerihkálaš veršuvnna filmmas go Frozen 2 čájehuvvui vuosttaš geardde Hollywoodas mánu áigi, muhto son illuda erenoamážit oaidnit sámegiel veršuvnna.
– Šaddá hui dovdduide čuohcci vásáhus oaidnit dán stuora filmma davvisámegillii, ja njuorasmahttá mu jurddašit ahte sámi mánát besset oaidnit iežaset sáŋggáriid hupmame davvisámegiela kinošearpmas. Seammás lea veahá bahča illu dan dihte go livččen háliidan ahte buot sámi mánát olles Sámis livčče galgan oažžut vejolašvuođa oaidnit filmma iežaset gillii. Jáhkán liikká ahte dát lea dušše álgu ja ahte mii beassat vásihit oaidnit eanet stuora filmmaid maiddái eará sámi gielaide dađi mielde, dadjá presideanta.
Stockholmas, Ruoŧas, lea našunála ovdapremiera sotnabeaivvi 15.12 ja Helssegis, Suomas, lea našunála ovdapremiera mánnodaga 16.12. Sámegielat veršuvdna čájehuvvo de oktanaga našunála gielat filmmaiguin. Sámegiel vešuvdna tektejuvvo našunála gielaide.
Loga maid: Walt Disney Animation Studios-ovttasbargu addá lasseváikkuhusaid Sápmái
Sámediggi almmuha govaid iešguđet ovdapremierain min almmolaš Facebook-kontos lávvordaga, maid media friddja oažžu geavahit.