Sámediggeráđđi Silje Karine Muotka (Foto: Kenneth Hætta)
Proposišuvnnas 70 L (2011-2012), nannejuvvo ahte lea oppalaš gielddus vuotnalinnjáid siskkobealde fatnasiidda mat leat badjel 15 mehtera doaibmaguovllus.
Proposišuvnnas čuožžu ná:
"Departementet meiner difor at det skal etablerast eit generelt forbod mot fiske innanfor fjordlinjene for fartøy over 15 meter i verkeområdet, og at det skal vere opning for å gjere unntak frå dette forbodet. Slik departementet ser det kan spørsmål om kva fartøy som kan få unntak frå forbodet, om fjordlinjene er sett fornuftig og liknande, vere noko ei fjordfiskenemnd kan drøfte og uttale seg om."
Nugo oidno proposišuvnnas 70 L, de sáhttá muhtumin addit lobi bivdit fatnasiiguin mat leat badjel 15 mehtera vuotnalinnjáid siskkobealde, muhto dalle galgá ášši biddjojuvvot vuotnaguolástanlávdegoddái cealkámuša várás, masa Sámediggi ii lean ovttaoaivilis.
– Direktevra ii leat bidjan ášši ovdan vuotnaguolástanlávdegottis iige Sámedikkis, maid cuiggodit garrasit. Mearrádusas dahkkojuvvo dat oppalaš njuolggadussan, mas Stuorradiggi eaktudii ahte ovttaskas sierralobiin galggai duođaštit ja ákkastit vejolaš sierralobiid ja váldit ovdan sihke vuotnaguolástanlávdegottis ja Sámedikkis ovdal go sierralohpi addojuvvo. Njuolggadusat leat čielgasat, ahte lea ollislaš gieddus masa sáhttá addit sierralobi, iige nuppe láhkai, ja dan mii eat sáhte dohkkehit, dadjá Muotka.
Sámediggi oaivvilda ahte bivddu rahpan fatnasiidda mat lea badjel 15 mehtera suhttada ja lea Stuorradikki mearrádusa ja dan ovttamielalašvuođa garvin mii šattai stáhta eiseválddiid ja Sámedikki gaskka áššis, dadjá sámediggeráđđi Silje Karine Muotka.
– Dát lea ollislaččat dohkketmeahttun, dadjá Muotka, guhte áigu váldit ášši ovdan guolástusministariin čoahkkimis juovlamánus.
Váldde oktavuođa sámediggeráđiin; Silje Karine Muotka, +47 984 87 576