Sámi allaskuvla ja UiT Norgga Árktalaš universitehta leat 2015 dálvvi rájes bargan dainna áigumušain ahte álggahit bachelorprográmma buohccidivššus sámegillii. Dan barggu oktavuođas attii Sámediggi prošeaktaruđaid čielggadit oahpu vuođu. Čielggadus gávnnaha ahte lea hoahppu ásahit sámi buhcciiddivššároahpu.
-Lea oahpis ahte váilot buhcciiddivššárat geain lea sámi giella- ja kulturgelbbolašvuohta. Sámediggi, guovddášeiseválddit ja gielddat main leat sámi buohccit leat máŋgii čujuhan dan. Min mielas lea Sámi allaskuvlla ja UiT álgga deaŧalaš doaibmabidjun dasa ahte dustet dán hástalusa, dadjá ráđđelahttu Mikkel Eskil Mikkelsen.
Stuorra caggin viidásat barggus leat dat ekonomalaš rámmat mat oahppoásahusat fertejit váldit vuhtii. Ii oro leamen stuorra vejolašvuohta sidjiide bisuhit fálaldaga jus eai oaččo ruđaid olggobealde.
Sámediggeráđđi lea meannudan ášši mannan vahkus ja ipmirda čuolmmaid ásaheami oktavuođas.
- Mii oaivvildit ahte guovddáš eiseválddiin lea čielga ovddasvástádus láhčimis dasa ahte sámi buohccit sáhttet geavahit gielaset dearvvašvuođa- ja fuolahusbálvalusas. Nu go maiddái čielggadus deattasta. Danne mii leat bivdán oktasaš čoahkkima departemeanttaiguin gávdnan dihtii čovdosiid oahpu ásaheapmái, loahpaha Mikkelsen.
Jearahallama várás sáhttá váldit oktavuođa sámediggeráđiin Mikkel Eskil Mikkelsen. Tel. 91 74 21 61