Vaikko sámegiella lea ain beaivválaš giellan oallugiidda gielddas, de goitge lea nu ahte dárogiella gullo eanet ahte eanet go olbmot deaivvadit. Jane Astrid Juuso lea iežas barggus gielddas, Isak Saba guovddáža jođiheaddjin, bargan ásahit sosiála arenaid gos sámegiella lea váldogiellan. Daid fálaldagaid lea heivehan sihke mánáide, nuoraide, rávisolbmuide ja vuorasolbmuide.
– Jane Astrid Juuso lea váikkuhan dasa ahte sámegiella lea hui buori ja positiiva dilis Unjárggas. Son lea ánssášan giellamovttiidahttinbálkkašumi go lea movttiidahttán sihke nuorat ja vuorraset olbmuid gielddas sámástit, lohká Sámedikki presideanta Vibeke Larsen.
Áŋgirit bargan giellaealáskahttimiin
Juuso lea maid hui áŋgirit bargan sámegiela ealáskahttima fágalaš bargguin ja ráhkadan kurssa “Válddán giellan ruovttoluotta/Jeg tar språket mitt tilbake”, mii lea anus maid Ruoŧa bealde Sámis.
– Jane Astrid Juuso lea čađahan daid prošeavttaid iežas barggu oktavuođas guovddáža jođiheaddjin, muhto su iežas áŋgiruššan lea leamaš mielde movttiidahttime ja oččodeame ođđa giellageavaheddjiid, lohká Larsen.
Bálkkašupmi lea 50.000 ruvnno ja dáiddadiploma, man Sven Niklas Blindh lea hábmen.
Guđat vuoiti
Sámi giellaráđđi ásahii giellamovttiidahttinbálkkašumi jagi 2000. Dan maŋŋel lea Sámedikki giellastivra ja sámediggeráđđi juolludan bálkkašumi.
Sámedikki giellamovttiidahttinbálkkašumi ovdalaš vihtta vuoiti leat Divttasvuona váhnenjoavku 2000:s, Skániid giellajoavku 2001:s, Harry Solhaug Gáivuonas 2002:s, Sagka Stångberg Deartnás 2009:s ja Iŋgor Ántte Ánte Mihkkal/Ánte Mikkel Gaup 2013:s.
Jus áiggut jearahallama, de váldde oktavuođa Sámedikki presideanttain Vibeke Larseniin, tel. +47 941 30 116.
