Gieskat mearriduvvon doaibmaplánas «Kulturell og kreativ næring - et uforløst potensiale» leat máŋga ođđa áŋgiruššansuorggi sajáiduvvan.
Ođđa prošeakta mas gielda lea fárus
«Hutkás gielda» lea Sámedikki ođđa áŋgiruššansuorgi. Dás váldá Sámediggi fárrui ja ovttasbargá gielddain ja ealáhusain hui árrat, vai bargu čanastuvvo gieldda jođihangoddái ja daidda oassálastiide geat leat fárus. Jagi 2018 mielde galgá prošeakta čađahuvvot ovtta gielddas Sámis, mii šaddá ovddasmannikunddarin, ja geainna ja geas Sámediggi galgá háhkat vásáhusaid.
– Dáinna lágiin mii doaivut ahte áŋgiruššan ealáhusain galgá addit stuorát beavttu, dadjá sámediggeráđđi Mariann Wollmann Magga ja muitala ahte Sámediggi lea váldán ovdan kultuvrralaš ja hutkás ealáhusaid čoahkkimiin gielddaiguin.
– Áŋgiruššan dáinna ealáhusain lea deaŧalaš dasa ahte gáhttet kultuvrra, seammás go sáhttit vuolggahit ođđa bargosajiid. Ollugiidda geat doibmet dán suorggis ii leat ruhta jođihanfápmun, muhto ásaheapmi leat dávjá čadnojuvvon persovnnalaš dáiddalaš mihttomeriide ja hutkás doaibmamii dainna dáhtuin ahte nannet sámi kultuvrra ja identitehta dáidaga bokte, dadjá Magga.
Álggaha Dáhttu 2.0
Sámediggi galgá váikkuhit dasa ahte sámi dáiddárat ja kulturdoaimmaheaddjit sáhttet lasihit iežaset dietnasa vai sáhttet birget iežaset doaimmain. Juksan dihtii mihttomeari áigu Sámediggi fuolahit ahte ealáhus ovdána sihke gealboloktemiin, fierpmádagaiguin, ovttasbargguin, kapitálaháhkamiin, identitehtain ja idealismmain.
Ođđa doaibmabidjun 2017 ja 2018 várás lea Dáhttu 2.0, prográmma mii lea ráhkaduvvon sámi kultuvrralaš ja hutkás ealáhusfitnodagaid várás main lea ovdánanáigumuš. Prográmma oassálastit ožžot 30 diimmu oaivadeami.
Ollu oassálastiin lea báikkálaš/guvllolaš márkan. Dutkan čájeha ahte buoridan dihtii gánnáheami fertejit fitnodagat viiddidit márkanguovllu. Dat galgá leat Dáhttu 2.0 váldodeaddu.
– Hutkáivuohta lea deaŧalaš fitnodagaid ovdáneapmái go galget gávdnat ođđa márkaniid. Mun oaivvildan ahte sámi hutkás ealáhusain lea stuorra vejolašvuohta buot osiin riikkas, ja erenoamážit riikkaidgaskasaččat, loahpaha sámediggeráđđi Mariann Wollmann Magga.
Eanet dieđuid addá sámediggeráđđi Magga, mob. 977 02 350.