Muhtun prošeavttain manná luohti dego rukses árpu čađa prošeavtta. Dat lea mielddisbuktán buori sámi musihkkajagi mas lea geavaheaddjiláđis ja geasuheaddji musihkka buori kvalitehtas. Dat čájeha ahte sámi musihkka lea ain ovdáneame, ja ahte lea stuora beroštupmi sihke árbevirolaš luohtái ja ođđa musihkkii.
Sámediggeráđđi Henrik Olsen (Govven: Vaino Rensberg/Sámediggi)
- Lassin árbevirolaš luohtealmmuhemiide, de sámi musihkkarat ovdanbuktet musihka mii geasuha olu olbmuid. Ortnet sáhttá leat buorren vuolggasadjin sámi artisttaid vejolašvuhtii olahit eanet guldaleddjiid, dadjá sámediggeráđđi Henrik Olsen.
Juolludusaid mihttomearri lea ovddidit buori sámi musihka maid oallugat olahit. Luđiid ja sámi musihka almmuhemiid ohcanvuđot ortnet lea bivnnut, ja Sámediggi vásiha stuora beroštumi.
Earret eará lea dovddus KEiiNO-joavkku vuosttaš álbum ožžon doarjaga. Skearru lea globála musihkkaprošeakta, mas lassin iežas musihkkakomposišuvnnaide maiddái almmuhit lávlagiid maid eará álgoálbmotartistat leat čállán.
Saha Records AS oažžu dán háve juolludemiid guovtti álbumalmmuheapmái, nubbi lea ásahuvvon joavku ja nubbi fas almmuha iežas vuosttaš luohtealmmuheami.
- Nubbi, Felgen orkester, čuojaha popluođi buori kvalitehtas, ja nubbi fas lea Gisle Soleng vuosttaš luohteálbuma. Nuorra juoigi gii ii leat vel sajáiduvvan. Solengas lea buorre ja vuogas jietna maid mii áiggi mielde beassat gullat olu, loahpaha sámediggeráđđi Henrik Olsen.
Luohte- ja sámi musihkkaalmmuhemiid doarjjaortnega boahtte ohcanáigemearri lea cuoŋománu 1.b 2020.
Gažaldagaid ja jearahallamiid vástida sámediggeráđđi Henrik Olsen, tlf +47 907 75 219