Láhkaevttohus doalvu viidáseappot ollu daid konsultašuvdnaprosedyraid mat mearriduvvojedje 2005:s ja lea Sámi vuoigatvuođalávdegotti evttohusa čuovvuleapmi, mii lei gulaskuddamis giđđat 2009.
- Mii leat ožžon stuorát čielggasvuođa das movt okta deaŧaleamos gaskaomiin sámepolitihkas galgá geavahuvvot. Konsultašuvdnanjuolggadus sihkkarastá ahte Sámediggi ja eará njuolga guoskkahuvvon sámi beroštumit servet juksan dihtii ovttamielalašvuođa mearrádusaid dahkamiin mat midjiide leat deaŧalaččat. Njuolggadusat leat deaŧalaččat vai sihke Sámediggi ja eará sámi beroštumit sáhttet leat mielde hábmemin ja mearrideamen boahtteáiggi eavttuid sámi giela, kultuvrra, ealáhusaid ja servodateallima várás, dadjá Sámedikki presideanta Aili Keskitalo.
Gielddaid ja fylkkagielddaid konsultašuvdnageatnegasvuohta fakkastuvvo lágas nu ahte addojuvvo munni iešguđege vugiin gozihit konsultašuvdnageatnegasvuođa, dan vuođul go leat stuorra erohusat gielddaid gaskka sturrodaga, gelbbolašvuođa ja searvanhámi ektui go lea sáhka sámi beroštumiin.
- Gielddaid ja fylkkagielddaid konsultašuvdnageatnegasvuođa láhkačatnamiin nannejuvvo maiddái vuođđu ovttas bargat sámi beroštumiid, gielddaid ja ja fylkkagielddaid gaskka. Lágas biddjojuvvo nu ahte dán konsultašuvdnageatnegasvuođa sáhttá gozihit iešguđege láhkai ja danne vuorddán mun mielas buriid proseassaid dán birra ávkin báikkálaš, regionála ja sámi servodatovddideapmái, dadjá Keskitalo.
Sámediggeráđđi ovddida dál evttohusa Sámedikki dievasčoahkkimii miehtanmeannudeapmái, ovdal go ráđđehus ovddida proposišuvnna Stuorradiggái.
Jearahallama addá Sámedikki presideanta Aili Keskitalo, tel. 971 29 305
Loga maid Gielda- ja ođasmahttindepartemeantta preassadieđáhusa dás.