Stuorradikki bearráigeahččan- ja vuođđudanlávdegoddi lea mearridan doallat rabas gulaskuddama maŋŋebárgga cuoŋománu 25. b. 2017 mii guoská duohtavuođakommišuvdnii sámi ja kvena álbmoga várás Norggas.
– Sámediggi lea gáibidan ahte álggahuvvo duohtavuođakommišuvdna mii duođašta guhkes áiggi assimilerenpolitihka váikkuhusaid stáhta beales, mii lea dagahan čiekŋalis háviid sámi álbmogii. Lea sáhka oažžut čilgejuvvot beliid lagaš nationála historjjá ektui, mii dagahii vealaheami ja vearredaguid sámi álbmotjovkui. Rabas gulaskuddamis sáhttá čuvgejuvvot manne lea deaŧalaš dán guorahallat ja mun lean ilus go lávdegoddi lea ovttaoaivilis, dadjá Sámedikki presideanta Vibeke Larsen.
Ságastallan dáruiduhttima guorahallamis Stuorradikkis
Bearráigeahččan- ja vuođđudanlávdegoddi lea mearridan doallat rabas gulaskuddama, nu ahte guoskevaš organisašuvnnat ja ásahusat sáhttet dieđihit sin beroštumi cealkámuššii. Lávdegoddi áigu dasa lassin addit árvalusa áššái, ja šaddá ságastallan Stuorradikki dievasčoahkkimis duohtavuođakommišuvnna birra ovdal geassemánu 21. b. dán jagi, duođašta lávdegotti čálli Thomas Dam Sámediggái.
Mearrádusa duogážin lea ovddastusevttohus 8:30 S (2016-2017) stuorradikki áirasiin Kirsti Bergstø ja Torgeir Knag Fylkesnes, geat leaba evttohan ahte Stuorradiggi bidjá guorahallankommišuvnna, mii galgá leat duohtavuođakommišuvdna dáruiduhttinpolitihka ja dan eahperievtti ektui mii lea geavvan sámi ja kvena álbmoga vuostá Norggas.
– Mun lean ovttaoaivilis evttoheddjiiguin geat čujuhit ahte Stuorradiggi dat galgá váldit ovddasvástádusa Norgga ovddas, mii ferte vuolggahit dán lágan guorahallankommišuvnna. Dás lea sáhka ovddasvástádusa váldimis dan oassái Norgga historjjás goas sámit ja kvenat vealahuvvojedje. Dalle lea vejolaš gávdnat vástádusa movt sáhtášii savvodit ovddit áiggiid háviid, dadjá Sámedikki presideanta Vibeke Larsen.
Romssa, Norlándda, Davvi-Trøndelága ja Mátta-Trøndelága fylkkadikkit leat dál addán doarjjacealkámušaid Sámediggái go guoská duohtavuođakommišuvnna vuolggaheapmái. Sámi girkoráđđi lea maiddái dorjon dán lágan kommišuvnna ásaheami.
– Čájeha ahte lea govda politihkalaš doarjja min gáibádussii guorahallankommišuvnna birra, ja mun doaivvun ahte maiddái Stuorradiggi joatká proseassain, dadjá Vibeke Larsen loahpas.
Jus áiggut jearahallat, de váldde oktavuođa Sámedikki presideanttain Vibeke Larseniin, tel: 941 30 116
Loga olles ovddastusevttohusa dás.