Sámediggi lea sámi giellavahku oktavuođas hábmen applikašuvnna mii lea vuosttažettiin heivehuvvon mánáidgárdemánáide ja vuođđoskuvllaohppiide. Ulbmil appain lea oahpahit buot mánáidgárdemánáide ja vuođđoskuvllaohppiide 10/20 sáni sámegielaide.
– Sámegielaid oainnusmahttimis lea maiddái sáhka máhttogaskkusteamis. Mii háliidit ahte servvodat galgá oažžut eanet máhtu ja áddejumi sámegielas, kultuvrras ja servodateallimis, ja mii jáhkkit ahte jus buot mánát oahpásmuvvet sámegielaide, de dat lea mielde loktemin giela árvvu ja seammás loktemin áddejumi giela erohusain, dadjá sámediggeráđđi Silje Karine Muotka.
Sánit appas leat sihke julev, mátta ja davvisámegillii ja dáidda sániide leat maid jietnabáttit. Appas sáhtát dása lassin oahppat vahkkobeivviid, loguid, ivnniid ja guokte mánáidlávlaga.
Sámediggeráđđi Silje Karine Muotka addá jearahallama ja vástida gažaldagaide, mob. +47 984 87 576, silje.karine.muotka@samediggi.no