Nordlándda álbmotmeahcceguovddážis oktan Besøkssenter nasjonalpark Nordland ja Adde Zetterquist dáiddagalleriijain, lea guovddáš ulbmilin gaskkustit sámi historjjá ja kultuvrra. Dál áigot guhkes áiggi barggu bokte ovdánahttit gievrras ja bissovaš lávddi ja gaskkustanarena sámi dáidaga, musihka ja girjjálašvuođa várás. Mihttomearrin lea buktit sámi kultuvrra oidnosii olbmuide lagašvuođain luonddu árvvuide dainna lágiin ahte áddejupmi, árvvus atnin ja beroštupmi sámi historjái ja kultuvrii nanosmuvvá.
Silje Karine Muotka
– Prošeakta sáhtášii váikkuhit sámi dáidaga ja kultuvrra eanet gaskkusteapmái ja lassin buvttašii dat maiddái servodatdigaštallama, dadjá sámediggeráđđi Silje Karine Muotka (NSR).
Nordlándda álbmotmeahcceguovddáš áigu čađahit ovtta publikumma lágideami dán jagi mii addá sidjiide vejolašvuođa deaivvadit iešguđege publikummain. Mánáid ja nuoraid geasuheapmi lea erenoamáš deaŧalaš sidjiide, man oktavuođas maiddái nuorra rávisolbmot leat mielde váikkuheamen ahte Nordlándda álbmotmeahcceguovddáš šattašii geasuheaddji arenan ja deaivvadanbáikin.
Nordlándda álbmotmeahcceguovddáš áigu ráhkadit lunddolaš deaivvadanbáikki sámiide Sálttu guovllus ja olles Sámis, ja sis leat ollu oktavuođat Norggas, Ruoŧas, Suomas geat veahkehit sin das. Sis lea fokus ollu šáŋŋeriidda sámi kultuvrras ja dáidagis prošeaktaplánas ja sis leat juo šiehtadusat artisttaiguin ja kulturbargiiguin.
– Ođđa arenat sámi dáidaga ja kultuvrra gaskkusteapmái leat deaŧalaččat, erenoamážit dáiddáriidda geat vuos eai lea ásahuvvon. Dán lágan fálaldat sáhtášii leat mielde loktemin eanet sámi dáiddáriid ollu šáŋŋeriin, dadjá Muotka.
Maŋŋá go sámi kulturprográmma 2020 lea loahpahuvvon áigu álbmotmeahcceguovddáš geahčadit vásihusaid ja ráhkadit guhkes áiggi plána dasa maid sámi lávdi ja gaskkustanarena Norlándda álbmotmeahcceguovddážis galggašii fállat.
Nordlándda álbmotmeahcceguovddáš lei ohcan 160 000 ru ja oažžu dan maid lei ohcan. Doarjja addojuvvo doarjjaortnegis Regionálaovddideapmi.
Gažaldagaide vástida dahje addá jearahallama sámediggeráđđi Silje Karine Muotka, mob. +47 984 87 576, silje.karine.muotka@samediggi.no