Ovttastuvvan Našuvnnat (ON) lea mearridan ahte 2019:s galgá biddjot earenoamáš fuomášupmi eamiálbmotgielaide, danne go dat leat garrasit áitojuvvon gielat. Ulbmil čalmmustahttimiin lea oažžut eambbogiid olles máilmmis bargat eamiálbmotgielaid seailluhemiin ja ovddidemiin. Jus gielat jávket, de lea ballu ahte kultuvra ja ealáhusat maid jávket áiggi mielde.
Sámediggepresideanta Aili Keskitalo ovddasta Árktalaš guovllu giellajagi stivrenjoavkkus man UNESCO jođiha.
– Lea buorre go ráđđehus juolluda ruđa Sámediggái giellajagi bargguid ovddidit ja čalmmustahttit, muhto mus lea vuordámuš ahte ráđđehus ieš maid aktiivvalaččat bargá eamiálbmotgielaid seailluhemiin, dadjá sámediggepresideanta Aili Keskitalo.
Giellajagi oktavuođas leat Sámedikkis guokte váldoáigumuša; sihkkarastit bistevaš doaimma Sámi giellagáldui ja oažžut stuorát aktevrraid mielde čoavdit hástalusaid mat eamiálbmotgielain leat odne giellateknologiija ja digitaliserema oktavuođas.
Sámediggi áigu lágidit stuorát giellakonferánssa Romssas guovvamánus boahtte jagi, gos áigut čalmmustahttit sihke Riikkaidgaskasaš eamiálbmotgielaid jagi ja Sámedikki giellaloktenstrategiijaid. Konferánsa šaddá viiddis, ja áigumuš lea maid bovdet eará eamiálbmogiid Árktalaš guovllus konferánsii.
Eambbo dieđuid eamiálbmotgielaid jagi birra gávnnat dáppe: www.IYIL2019.org