– Dat mearkkaša ahte Nussir ASA niehkoprošeakta viimmat lea loahpahuvvomin.
Nussir ASA oaččui 2016 juovlamánus nuoskkidanlága vuođul lobi geavahit mearradeponiija Riehpovuonas. Ealáhus- ja guolástusdepartemeanta gieđahallá dál doaibmalobi minerálalága vuođul.
Muotka oaivvilda ahte dál livččii áigi geahčadit mearradeponiija váikkuhusaid nugo ráđđehusbellodagat leat soahpan bargat.
– Mii fertet eastadit ruvkeindustriija billisteames eanet vuonaid ja duvdimis eret eará ealáhusdoaimmaid maid vuođđun lea luondu ja mat seailluhit kultuvrra, dadjá sámediggeráđi Silje K. Muotka.
Ráđđehusjulggaštusas deattuhuvvo ahte ii galgga ruvkeindustriija oažžut lobi geavahit ovttage ođđa mearradeponiija dán stuorradiggeáigodagas iige ovdal go minerálalága evalueren lea loahpahuvvon. Beroštumiid gaskkas maid departemeanta galgá árvvoštallat minerálalága vuođul leat váikkuhusat lundui ja sámi kultuvrra, ealáhusaid ja servodateallima luondduvuođu sihkkarastin.
– Mun lean vissis dasa ahte dákkár evalueren dajašii dan maid Sámediggi guhká lea oaivvildan, namalassii dan ahte Norga ii sáhte leat áibbas erenoamáš máilmmis ja diktit min vuonaid nuoskkidit, lohká Muotka.
Jos leat jearaldagat dahje áiggut jearahallama, de váldde oktavuođa sámediggeráđiin Silje K. Muotka, mob. +47 984 87 576