Norgga teknihkalaš – Luonddudieđalaš Universitehta (NTNU) Tråantes háliida loktet máhtu lullisámegiela birra skuvllas, erenoamážit Oahpaheaddjioahpu instituhtas. Mihttomearrin lea ahte bargit dieđalaš virggiin ožžot vuođđomáhtu lullisámegielas maid sii sáhttet geavahit oahpahusas ja dutkamis.
- Illudan beassat oaidnit sámi gielladoaibmabijuid regiovnna stuorámus universitehtas. Ohcci áigu dahkat sámegiela eanet oidnosis dainna lágiin ahte fállat kurssa buot bargiide, ja dat dagahivččii vejolažžan ásahit giellabirrasa NTNU:i guhkit áiggi vuollái, dadjá sámediggeráđđi Mikkel Eskil Mikkelsen (NSR).
Áigumuš kurssain lea maiddái čatnat oktavuođaid gaskal NTNU ja báikkálaš álbmoga, ja addit eanet olbmuide vejolašvuođa oahppat giela. Danne galgá kursa leat rabas báikkálaš olbmuide, sihke sápmelaččaide ja sidjiide geat eai leat sápmelaččat.
NTNU dieđuid mielde lea lassánan beroštupmi ja diehtomielalašvuohta sámegielaide maŋŋá UNESCOs Year of Indigenous Languages 2019, ja sii oaivvildit ahte lullisámegielkursa bisuhivččii dán beroštumi, illun sámediggeráđđái.
- Lea hui vuogas oaidnit ahte mannanjagi álgoálbmotgielaid riikkaidgaskasaš giellajahki lea vuolggahan oalgeváikkuhusaid, ja ahte dakkár stuorra ásahus go NTNU loaiddasta buorrin ovdamearkan, dadjá Mikkelsen.
Maŋŋágo kursa lea loahpahuvvon, de galgá ásahuvvot giellakafea gos olbmot ieža galget beassat ovddidit iežaset giellamáhtu viidáseappot. Giellakafea galgá doaibmat deaivvadansadjin buohkaide beroškeahttá das man bures sii hálddašit giela.
Sámediggeráđi juolludus čuovvu Muohtačalmmit-julggaštusa, sámediggeráđi álggahanjulggaštusa vuoruhemiid, mas earret eará deattuhuvvo dehálažžan sihkkarastit ahte sámegielat gullojit ja geavahuvvojit.
Jearahallama ja gažaldagaid várás, váldde oktavuođa Sámediggeráđi lahtuin Mikkel Eskil Mikkelsen, tel. +47 917 42 161. e.poasta: mikkel.eskil.mikkelsen@samediggi.no