Holmen gårds- og naturbarnehage lea priváhta mánáidgárdi Álttá suohkanis, mii háliida šaddat mánáidgárdin mii bargá mánáid implementeremiin ja ovddidemiin go deaivvadit sámi gielain ja kultuvrrain.
- Illudahttá go Sámediggi sáhttá fas addit doarjaga sámi mánáid giellaovdáneami nannemii. Deaŧalaš lea ahte mánáidgárdemánát ožžot sámi giellamovttiidahttima nu árrat go vejolaš, dadjá sámediggeráđđi Mikkel Eskil Mikkelsen (NSR).
Holmen gårds- og naturbarnehage oaččui 2017:s doarjaga prošektii “Giellaresursa”. Ulbmilin lei doarjut sámi mánáid sámegielas beaivválaš doaimmain ja stohkosiin mánáidgárddis, ja oahpásmahttit buot mánáid mánáidgárddis sámi kultuvrii ja sámegillii. Prošeaktaruđaiguin lei mánáidgárddis vejolašvuohta virgádit sámegielat resurssa 50% virgái. Prošeakta lea lihkostuvvan. Mánáidgárddi vánhemiid máhcahusdieđuin dadjá earret eará okta vánhen ahte mánná geavaha eanet sámegiela ruovttus dain beivviin go sámegielat giellaresursa lea leamaš mánáidgárddis.
Sin ođđa prošeakta 2020:s «Videreførelse av samisk språkprosjekt», rievdadivččii kultuvrra mánáidgárddis nu ahte sámi kultuvra ja sámegiella kvalitehta dáfus livččii oassin mánáidgárddi árgabeaivvis. Mánáidgárdi áigu virgádit sámegielat resurssa 100% virgái, gii galgá bargat mánnájoavkkuin, árvvoštallat barggu relevánta teoriija mielde, duođaštit barggu ja bagadit bargiid.
- Dát lea buorre buohkaide, sihke mánáide, vánhemiidda ja mánáidgárddi bargiide go sámegiella oažžu dan stáhtusa maid dat ánssáša dárogielat mánáidgárdeárgabeaivvis dadjá Mikkelsen.
Sámediggeráđđi juolluda 300.000 ru prošektii doarjjaortnegis Doarjja prošeavttaide ja ovddidanbargui mánáidgárddiin.
Jearahallama addá dahje vástida gažaldagaide sámediggeráđđi Mikkel Eskil Mikkelsen, tel. +47 917 42 161.